Dos ruman condena inhustamente a haya 75 miyon dollar

Un test di DNA a confirma inocencia di Henry McCollum, e preso cu mas tempo a pasa sperando su ehecucion na North Carolina, y di su mita ruman Leon Brown, kende ta sufri di problemanan mental a causa di e tempo cu el a pasa cera.

Un hurado den un caso federal di derechonan civil na North Carolina a otorga un suma di 75 miyon dollar na daño y perhuicio na e dos rumannan aki cu discapacidad intelectual cu  pasa decadanan largo tras di trali despues di a wordo declara culpabel inhustamente pa violacion y homicidio di un mucha muhe di 11 aña. Un hecho cometi na 1983.

E hurado di ocho persona a determina cu Henry McCollum y Leon Brown mester haya cada un un suma di 31 miyon dollar di indemnisacion, un miyon dollar pa cada aña cu nan a pasa cera den prison. Banda di esaki, a otorga nan tambe 13 miyon adicional.

McCollum y Brown a cuminsa e caso civil contra miembronan di Cuerpo Policial desde 2015, argumentando cu nan derechonan civil a wordo viola durante interogacion y cual a causa cu a declara nan culpabel.

Ambos a wordo exonera y libera na 2014 despues cu testnan di DNA a mustra den direccion di otro homber cera den prison. Ambos tabata hoben ora cu nan a wordo acusa di e crimen, cu a sosode na Red Springs,  Robeson.

Nan tabatin 19 y 15 aña y a wordo presiona durante interogacion pa nan confesa. Y a haya un castigo di morto.

McCollum a pasa gran parti di su 31 aña den prizon den e area di morto y a bira e preso cu mas  tempo a pasa tempo a pasa sperando su ehecucion. Brown, kende ta sufri problema mental door cu e tabata cera, mester di atencion tempo completo, a  cambia su castigo pa cadena perpetua prome cu a declar’e inocente.

Comments

comments