No ta un biaha e fenomeno aki ta sosode sino ta varios biaha caba ta manda polis na diferente parti di nos isla pa atende cu cacho los, tin biaha hasta brabo. Algun dia pasa hasta por a nota con polis mester a atende cu dos cacho los na Kibaima, un vena principal, trancando trafico formalmente.
Awe mainta polis mester a bay Alto Vista pa dos pitbull, parti pariba di e kapel, cu tabata ataca hende canando na pia.
Un di e personanan aki a keda levemente herida, pero no tabata kier asistencia medico. A manda polis pa tuma nota di e situacion. A pone e instancianan na altura p’asina atende cu e cachonan aki.
LEY DI CACHO
E pregunta principal ta keda con a para cu e ley di cacho cu tanto nan ta papia di dje. A bin cu ne, pero ta aplic’e. Esey ta loke hopi hende ta puntrando. Tin un unidad mobiel cu ta gara e cachonan cu supuestamente no tin banchi of ta cana los. Pero na varios ocasion por mira nan para bunita asina bao garashi den Caya Ernesto Petronia.
Nan ta den uzo ainda? Kico ta para cu e casonan aki caminda cu cachonan ta cana los? Awo cu aña a habri, por mira hopi cacho ta cana los, consecuencia di e tironan di 11 dia pasa y algun di nan ta brabo. Ta spera cu autoridad por bin cu un solucion pa e fenomeno aki.