Awo cu Havenstraat ta cera, ta afecta mas cu un liña di Arubus, ya cu esaki ta e caya principal na unda tur e busstationnan ta yega Oranjestad, for di cualkier direccion cu nan ta bin. Sr. Sannin Daou, di Arubus ta amplia.
Esaki ta bira algo cu ta afecta e liñanan 1, 2 cu ta bin for di San Nicolas, tambe liña 3, cu ta bin for di San Nicolas via Santa Cruz y liña 8 cu ta bin for di Sabana Basora. Analisando e situacion, a dicidi cu lo haci un solo desviacion, pa e liñanan, 1,2, 3 y 8 cu ta bin for di parti pariba, tur lo bin via di e rotonde na altura di Banco di Caribe. Nan lo bay direccion noord, den de La Sallestraat, despues lo bira na e rotonde di ex Marathon bay abao, pasa Van Leeuwenhoekstraat (bandi Maria College), sali na e crusada di De La Sallestraat, bira bay abao, drenta Profesor Lorenzstraat bay subi Driemasterstraat bay zuid, pa despues drenta e station di tram parti patras y lo yega e station di Oranjestad.
Arubus a opta pa haci esaki, ya cu si bay pasa otro rutanan, manera Boulevard, ta bay haya cu na momento cu tin barco cu hopi trafico e ta bay afecta e liñanan di bus hopi mas, cu lo pone cu ta core hopi mas laat. E ruta aki tambe lo tin su retrasonan, pero e ta bay ta mas constant cu lo por adapta mas facil pe. P’esey a publica esaki ariba e Facebook page di Arubus y algun website. Pero loke Arubus ta desea pa usuarionan di e liñanan aki pa tene bon cuenta cu esaki. Si antes tabata tuma bus den area di Wilhelminastraat pa Havenstraat bay abao, Arubus mester haci e desviacion.
Esunnan cu ta bin for di Santa Cruz, of esun cu ta bin di Dakota, tur lo pasa hunto na e rotonde di ex Marathon, bay abao, Van Leeuwenhoekstraat, pasa dilanti Maria College, sali ariba De La Sallestraat, bay abao, pasa dilanti La Salle College, drenta Profesor Lorenzstraat, drenta Driemasterstraat bay abao, yega station di Oranjestad te na busstation Oranjestad.
Tin dos opcion, busnan di liña 3 cu lo bin for di Santa Cruz, lo sigui straight na e rotonde di ex marathon straight abao y esun cu ta bin for di Dakota lo bira na Banco di Caribe bay noord y djey bay abao na altura di Marathon bay abao, drenta Van Leeuwenhoekstraat. Pero tur e liñanan lo bay e mesun direccion y tur e busnan, tur horario sea den dia of anochi, lo pasa e mesun ruta aki. Ta haci esaki pa no tin bruhamento pa un hende kere cu e ta pasa un caminda y ta resulta cu ta pasa otro caminda, e ora a opta pa uza un liña solamente.
Segun por a compronde e trabaonan lo dura di dia 15 te cu 25 di october. Den caso di cualkier cambio, Arubus lo anuncia esaki.
