SANFORD (FLA), Merca- Un mucha muhe di un aña y un mucha homber di cuater a muri diabierna door di hypertermia (calor excesivo), door cu nan a wordo laga pa un tempo largo den auto den e centro di Florida.
E mama di e mucha muhe, cu a muri den un auto para na un station di gasoline di Sanford, den e condado di Seminole, a wordo deteni y acusa di homicidio pa negligencia.
Segun e medio aki, Kailyn Pollard, di 29 aña, a lubida di hiba su yiu muhe creche y e mucha a keda cera den e auto pa shete ora, cual a causa su morto.
Den e caso di e mucha, un peaton a wak’e cu bida ainda den e auto y a yama polis. El a wordo hiba hospital pero ya tabata laat. Organisacionnan specialisa, manera Kids & Cars, ta calcula cu cada aña un promedio di 37 mucha ta muri na Merca door di a wordo exponi na temperaturanan halto den auto.
E cifra ta inclui muchanan laga atras den auto door di iresponsabilidad of olvido di personana cu tabata na su cargo y tambe sunnan cu a drenta den e auto y a keda pega door cu e auto a lock
Segun NoHeatStroke.org, desde 1998 te cu 28 di september, e cifra di muchanan cu ta muri di e manera aki na Merca, ta di 791.
“Tur e mortonan aki por a wordo evita”, e organisacion ta señala.