Caracas, VENEZUELA- E jornada di protestanan na Venezuela, convoca pa oposicion Venezolano, a bira e mobilisacion mas grandi contra di e asina yama revolucion Bolivariano, pero tambe tabata escenario di otro dos morto. Na Caracas un hoben di 17 aña a perde su bida y na Tachira, un muhe di 23 aña, pa cual e cantidad di mortonan a yega 10 den e ultimo tres simannan.
Ademas di demostra nan malcontento pa cu e gobierno di Presidente Nicolas Maduro, e masa opositor ta busca pa presiona Maduro pa separacion di podernan den e pais (exigiendo mas poder pa Congreso) y publicacion di cronograma electoral.
Esaki ta di 5 marcha yama pa oposicion den e ultimo 15 dianan, den cual nan tabata victimanan di un represion di parti di e forsanan di siguridad di Estado y bandanan arma auspicia door di gobierno, cu a laga shete persona morto y 538 detencion.
Presidente di Venezuela, Nicolas Maduro a convoca oposicion politico na un dialogo nobo, el a nombra su voceronan pa posibel encuentronan y ela señala cu e tin un proposicion pa haci na oposicion.
Di otro banda, miembronan di Guardia Nacional Bolivariano a disolve cu gasnan lacrimogeno e concentracion opositor den e zona di El Paraiso, ora cu esaki tabata purba yega centro di ciudad. Esaki ta envoca cden un enfrentamento cu algun manifestante cu a tira piedra riba e agentenan.
Varios persona den e marcha a avansa te na e sede di Defensoria desde 26 punto di e ciudad. Hopi di nan a wordo stroba door di Guardia Nacional cu gas, balanan di rubber y tankinan di awa.
Como consecuencia di un atake directo di un efecto di Polis Nacional Bolivariano di Caracas, un hoben di 28 aña a sufri un fractura di craneo despues di a ricibi un impacto di un bomba lacrimogeno.
E crisis economico y politico ta aumenta e descontento. Venezolanonan ta biba diaraimente un escasez di productonan basico manera lechi, galiña, carni, remedi di tur tipo mientras nan ta purba di rek e salario mas cu nan por door di un inflacion cu IMF a calcula di yega 720.5% pa 2017.
Oposicion a convoca otro marcha pa diahuebs, 20 di April.