CARACAS/BRASILIA- E enfrentamentonan cu diabierna un comunidad indigena tabata tin cu e Forsanan Arma di Venezuela den e estado Bolivar, na frontera cu Brazil, a cobra bida di dos persona indigena, según e diputaro opositor America de Grazia.
Según datonan di e diputado, tin al menos 15 persona herida di cual tres ta grave.
Informacionnan duna door di e diputadona di Bolivar, e indigenanan Pemon di e comunidad Kumarakapay a enfrenta contra e militarnan cu tabata impedi e entrada di ayuda humanitario cu ta den e centro di acopio na Roraima y cu e gobierno di Nicolas Maduro ta nenga di acepta.
Deb declaracionnan na e canal online VIVOplay, De Grazia a indica cu den oranan di mainta tabata tin un tiroteo cu a laga mas di 15 persona herida, di cual tres a wordo traslada pa hospital Santa Elena de Uairen (Bolivar) y un ‘indigena a fayece’.
E parlamentario a sigui bisa cu tin enfrentamentonan tumando luga desde diahuebs, dia cu Maduro a duna ordo pa cera e frontera cu Brazil.
E prome fayecido tabata e muhe identifica como Zoraida Rodriguez, mientras cu tur e otro heridonan tabata hende homber.
De Grazia a sigura, ademas, di cu e indigenanan tin e general Jose Montoya reteni y a alerta e gobierno di Maduro lo por inculpa e general di e sucedido cu e indigenanan.
Otro parlamentarionan, manera Olival Lozano, a informa cu e indigenanan di e estado aki ta protestando y ta exigiendo e militarnan pa respeta constitucion y pa “para na banda di e pueblo”.
Na estado Bolivar, cu ta un di e estadonan mas rico di Venezuela pa su explotacion di oro, petroleo, diamanta y coltan, tin un comision di parlamentarionan pa busca e ayudo humano diasabra awo, a pesar di e rechaso di Maduro.
E donacionnan cu ta bin di Merca y otro nacionnan ta den un punto di acopio den e paisnan bisiña di Venezuela manera Colombia, Brazil y Corsou.
Pero Maduro a duna ordo diahuebs pa cera e frontera cu Brazil y cu e islanan Hulandes den Caribe, mientras e ta analisa si e ta haci esaki cu Colombia.
Poco despues, Guaido a duna ordo pa apertura di e frontera cu Brazil y pa mantene relacionnan diplomatico cu e islanan Hulandes.