E partido politico Centro Democratico, cu ta wordo lidera door di ex- presidente y actual senador Colombiano Alvaro Uribe, lo presenta diahuebs un denuncia na Ministerio Publico contra di dos ex- minister, Cecilia Alvarez y Gina Parody. E dos ministernan aki parce di ta involucra den e caso di corupcion di e compania di construccion Brasilero Odebrecht.
E denuncia lo wordo entrega despues cu e ex- presidente Uribe a sigura cu e famia di Gina Parody tin interes den e Tramo II di e Ruta del Sol, cada biaha cu nan construi un haf den e zona ey.
Di nan banda, Alvarez y Parody a saca un comunicado unda nan ta sigura cu nan a entrega “un denuncia di persecusion contra di Senador Uribe contra di nan y contra di nan famia, for di momento cu nos a denuncia e paramilitarismo tempo cu e tabata den gobierno”.
Segun documentonan publica dia 21 di December ultimo pa Departamento di Husticia di Merca, Odebrecht a paga mas o menos 788 miyon dollar na soborno na 12 pais Latinoamericano y Africa, entre nan Colombia. Na e pais aki Odebrecht lo a paga mas di 11 miyon dollar entre 2009 y 2014.
Dia 12 di Januari autoridadnan Colombiano a detene Gabriel Garcia Morales, vice minister di Transporte durante e Gobierno di ex- Presidente Alvaro Uribe pa ta supuestamente involucra den e caso.