Bo a purba e especie invasivo Lionfish caba? E ta sumamente sabroso y e miho forma pa combati’e ta pa captura y come e pisca aki. Ademas di ta dushi pa come, Lionfish ta saludable cu contenido halto di omega 3. Bo ke sa mas di esaki? Diasabra y Diadomingo awor ta bo miho chens pa e aña aki. Hadicurari, Centro di Pesca a uni forsa un biaha mas cu Santa Rosa, Jolly Pirates, Romar Trading, Wine and Dine y Aruba Reef Care Foundation, pa patrocina 2 actividad atractivo pa bo haya informacion di Lionfish y alabes purba esaki pa bo mes.
Evento gratis riba beach diasabra:
Diasabra 26 di November di 1’or pa 4’or di atardi na e clausura di e Hadicurari Lionfish Challenge, lo bo por purba pisca cu e casadonan trece, completamente gratis, mientras cu tin. Esaki ta tuma luga na beach dilanti di e pier di Hadicurari situa entre Moomba Beach Club y Marriott Ocean Club. Aki tin e final di e competencia di gara Lionfish. Lo tin dunamento di informacion, como tambe demostracion di traha cu e pisca, filetia y haci limpi, y tambe lo tin muestranan di Lionfish hasa na diferente forma door di Nos Clubhuis restaurant cortesia di Wine and Dine.
Contribui 50 florin diadomingo y disfruta:
Diadomingo 27 di November tambe bo tin chens di saborea Lionfish. Contribuyendo cu un ticket na valor di 50 florin bo por gosa di creacion culinario di 5 chef magnifico, ricibi pakete di informacion incluso receta, haya informacion di boluntarionan presente y disfruta di bahada di solo den un ambiente fenomenal na Nos Clubhuis purbando biñanan specialmente acopla, cortesia di Romar Trading y Wine and Dine. Ainda a keda algun ticket na e Oficina di Jolly Pirates Aruba of yamando 592-7858. Tur fondo recauda ta pa e esfuersonan di combati Lionfish na Aruba.