Durante un conferencia di prensa Funari a presenta nan future proyectonan, bou guia di algun hoben. Funari ta un fundacion cu durante siman ta ricibi personanan den rolstoel, tanto adulto grandi como hoben, y mantene nan den un forma of otro activo.
Un di e lidernan di e proyecto aki ta Jeandre Henriquez, kende a pesar di tin un limitacion fisico ta hopi activo riba computer y ta un persona basta artistico. Cu hopi entusiasmo el a ehecuta e opdracht cu el a haya pa diseña un logo pa Funari. “Mi ta hopi contento di por a haya chens pa demostra mi talentonan. Mi ta hopi gradici na Funari y ta spera cu otro fundacion y companianan duna personanan cu un limitacion un chens pa demostra nan talentonan.”
Otro hoben cu a participa activamente den e plannan di Funari ta Richi Statie. El a splica cu despues cu el a bolbe di Colombia, el a pasa basta tempo cera den cas. Na momento cu el a sali tabata pa wak un careda y a surgi e pensamento pa haci algo asina pa personanan cu limitacion, manera su persona mes. E ta un bon chens pa saca tur hende den rolstoel for di cas y laga nan subi caya haciendo algo diferente.
Den esaki el a haya ayudo di Glennon Eights, kende ta un atleta masha conoci na Aruba. E Fun Run & Walk ta sali for di Funari na Savaneta, coy direccion di La Graja (e caminda patras banda di Santo Largo) y bolbe. Tin dos distancia, e mas largo ta di 5 KM y esun mas cortico di 1.5 KM, pa esnan cu no ta mucho custumbra pa cana hopi.
E evento ta tuma luga dia prome di augustus awo pa 7’or di mainta. Inscripcion ta costa 10 florin y ta cuminsa registra pa 6’or di mainta. Pa por inscribi adelanta por yama 58468522 of 7471420.
El a haci apelacion na tur hende pa yuda e clientenan di Funari y e ta un forma pa contribui cu tur e otro proyectonan cu kier realisa pa e miembronan den futuro.