Pa por yega bo grupo di obhetivo mas eficiente y efectivo cu ta posibel, e dunador di servicio mester sali mas tanto cu ta posibel for di su oficina. Segun estudionan haci na Hulanda, mucha y hobennan Antiano/Arubiano ta negligente na busca solucion pa nan problemanan. Esaki ta trece cune cu organisacionnan cu di berdad kier haci un diferencia den bida di e mucha y hobennan, mester sali mas for di oficina y bay busca e mucha y hobennan caminda nan ta.
Organisacionnan mester opera mas ‘outreachend’. Esaki ta encera cu e organisacion mester bay busca e mucha y e hobennan mas hopi cu ta posibel na nan luganan di encuentro. Telefon pa Hubentud pa añas caba, banda di su actividad principal cu ta e ayudo via di telefon, email y chat na mucha y hobennan, ta ofreciendo charla, tayer y proyecto den scolnan, trai merdia, Formacion Social, clubnan deportivo y otro lugarnan di recreacion di mucha y hobennan. Esaki a trece cune cu den aña 2015 Telefon pa Hubentud, banda di duna informacion preventivo pa medio di yamada, email y chat, a logra duna informacion preventivo atrabes di charla, tayer y proyecto na 8727 persona. Di e 8727 personanan aki 3762 tabata mucha, 4428 tabata hoben, 57 tabata mayor, 212 tabata docente y 268 tabata otro profesional.
Na e manera aki Telefon pa Hubentud ta yuda haci mucha y hobennan autosuficiente, ta sostene mayornan cu educacion di nan yiunan y ta yuda docentenan haci e ambiente di duna y ricibi les den klas mas sigur. E charla, tayer y proyectonan ta gratis.
Danki na e contactonan cu Telefon pa Hubentud, pa medio di telefon, email y chat nos por tende directamente di nos mucha y hobennan kico ta biba bao di nan y asina Telefon pa Hubentud ta / por desaroya e charla, tayer y proyectonan.