Ta conoci cu durante Carnaval, hopi ta e bendedonan ambulante cu ta bende varios producto. Esakinan ta varia for di cocada/pinda te cu e blekinan di spuit di foam. Esakinan ta wordo cumpra door di mayornan pa asina duna nan yiunan, cu nan turno ta spuitnan riba e trucknan, e bannernan, carosa, etc. Loke e mayornan no sa, ta e daño cu nan ta haciendo na e trucknan, e carosanan. Riba e trucknan tin tambe e banner di sponsornan, cu tambe ta wordo gespuit cu e foamnan aki. Sr. Luigi Rasmijn, doño di compania cu ta traha cu truck cu ta traha den Carnaval ta splica di e daño cu e foamienan aki por haci na e trucknan.
Segun Rasmijn, e fenomeno aki tin añas caba ta presentando su mes, y niun hende no sa nan ken mester acudi pa duna keho. Ta parce cu tur hende tin miedo di expresa nan mes. Hopi hende no sa cu e foamnan aki ta causa daño na e trucknan, na bannernan di sponsor, carosa, plumanan. Cosnan cu ta costa hopi placa. Hasta auto di polis ta haya. E foamnan aki ta daña e piesanan di Carnaval. Tur doño di grupo tin e mesun keho cu Sr. Rasmijn.
A hasta acerca SMAC, pero el a haya contesta cu nan no por haci nada, a acerca polis cu tampoco no por haci nada. Sr. Rasmijn a sigui bisa cu esun cu por haci algo ta esun cu ta duna vergunning pa bende esakinan ariba ruta. E cosnan ta dañino, y apart di ta dañino, e ta inflammabel. Hopi susceptibel pa candela. Muchanan inocente ta spuit esakinan ariba auto, of te hasta den cara di hende. Un chispa por causa un daño grandi, y ta e mayor ta esun cu ta keda responsabel. Mayornan mester ta mas consciente, mas responsabel. Pa algun aña caba, ta bezig cu esaki, y awo na 2018, keto bay tin mesun problema aki. Ya no sa mas cerca ken recuri. Un hende mester scucha y tuma accion. Ta pidi por fabor pa haci algo, si no ta e aña aki ainda ya cu Carnaval ta caba e fin di siman aki. Ta hopi placa ta wordo inverti den e bunitesa di nos carnaval, pa nan wordo daña pa e foamnan aki. Y si un hende bira bisa algo, nan ta wordo ataca door di e mayornan. E situacion aki ta basta fastioso.
Por a compronde cu despues di Lighting Parade, un di e foamnan aki, a trece un peliger despues di e parada na altura di ex DOW. Aunke Sr. Rasmijn no sa di e sucedido aki, e ta reitera cu e foamnan aki ta pega candela. Unabes cu e wordo gespuit, anochi e tin hopi chens cu e lo por kita, door di basha awa cayente ariba dje. Pero ora cu topa solo den dia, e ta seca y e no ta kita (Facilmente). Varios di e gruponan ta zundra, ya cu banner di e sponsornan ta wordo susha. Ta gasta tempo y placa, y pa un simpel spuitbus ta susha e banner of piesa cu un persona a inverti placa den dje, y esey ta hopi di lamenta. E plumanan uza pa carosa, bodypiece, etc ta costa hopi placa pa un, y cu e ta wordo susha cu’n spuitbus di foam. Kisas polis lo por haci algo toch, pa cu e preocupacion di e comerciante y e participantenan.
Sr. Rasmijn ta spera cu pa e proximo temporada di Carnaval lo por tin un solucion pa cu e esaki. Durante parada tabata tambe un incidente caminda un banda ta stop di toca pa informa pa por fabor no spuit ariba e bannernan. Pero esaki a trece hopi reaccion negativo pa cu e banda. Pero esunnan cu ta core den parada of cu ta inverti, mester pone den nan sapato pa sa con nan ta sinti.
A bira tempo pa stop di bende e foamnan aki, segun Sr. Rasmijn.