Caminda nan cu trucknan di carga ta uza casi tur dia ta den mal estado pa cual a acerca director di DOW, Sr. Marlon Croes pa haya sa kico lo bay haci pa cu esaki mirando e preocupacionnan.
Desde cu e containerhaven a muda pa Barcadera, tin un otro movecion den e transporte di carga y e acceso cu nan tin ta 3 caminda, cual ta di Mahuma pa Parkietenbos, of Simeon Antonio y bay di biaha pa eynan. Akinan a haci varios mantencion di e camindanan caba. Pero Simeon Antonio ta un bario residencial cu mester tene cuenta cun’e.
E aña aki tin riba plan pa bay mehora e caminda di Mahuma pa Parkietenbos, pa e trafico pisa por move mas confortabel riba e careteranan, direccion Barcadera y e caminda di Drive Inn bin abao.
Uno cu pronto lo habri ta e Green Corridor, cual ta e caminda cu ta baha di Seroe Tijsjie bay straight Barcadera. E aña aki lo habri un ader nobo y e otro ta cu lo drecha e caminda di Mahuma pa Barcedera cual lo yuda.
Riba e pregunta si ta lo ta trata di recap e careteranan of si lo drechanan, Sr. Croes a informa cu camindanan cu mester di recap, DOW lo recap esakinan y camindanan cu mester di wordo drecha, DOW lo drecha esakinan.