Donny Rasmijn, parlamentario di AVP, durante nan conferencia di prensa di diahuebs, a toca parti di un cambio cu lo bin den nos motorrijtuig en motorboot belastingsverordening. Tin cambionan cu a tuma luga, por ehempel den e manera cu belasting ta wordo paga riba nummer plaat e cuminsamento di e aña aki. A dicidi di mantene e number di aña pasa y lo bin cu un nummer plaat cu lo ta vast riba un auto y tambe a introduci un sticker, cu ora ta paga e nummerplaat, ta djis e sticker ta pega riba e auto, cu ora cu control ta wordo haci door di polis, por mira cu a paga e nummerplaat si of no. Ademas di esey tin mas cambio cu tin cu tuma luga. Keto bay e heffingnan aki, no ta tuma luga corectamente. Tin basta hende cu no ta yega pa paga e belasting aki manera debe ser. Sa cu tin e posibilidad di basta tempo caba, pa por paga e nummerplaat per kwartaal, mita aña of full aña. Den esaki tambe tin hopi problema pa controla. Imagina cu mita aña bo ta haya e otro pida plachi di dje, manera ta custumber. Ora cu ta paga den kwartaal, unico manera pa autoridad wak cu bo nummerplaat ta paga ta door di parabo y verifica si esey ta e caso. Den e heffingnan aki tin diferente cambio cu ta wordo proponi. Un di nan ta cu lo bay cu ta paga full aña of mita aña y comerciantenan cu tin cu paga full aña den un solo biaha. Esaki ta trece cune cu e cumplimento di e heffing aki lo bay ta mas miho, pero tin cu pensa riba e homber chikito cu ta pagando den kwartaal. Por bisa cu finalmente, si lo mantene na mita aña of kwartaal, cual discusion lo tuma luga. Pero un cambio grandi cu lo bay tin ta, cu autoridad no tin nodo di parabo awor aki pa check si bo tin bo nummerplaat paga si of no, pa bo cumpli cun’e. E manera cu nan ta aby haci e heffing ta cu for di belastingkantoor mes, nan ta wak cu e temporada a pasa, cu bo mester pasa. Bo mester a paga e nummerplaat, cu automaticamente cobransa ta bay na bo cas pa bo paga esey. Kiermen cu un polis no tin nodo di parabo pa dunabo un boet y despues bo ta bay paga e boet y riba dje bo tin cu bay paga e nummerplaat tambe. Esey ta costabo mas placa y ta mas trabao tambe pa Gobierno. Den e caso aki ta haya e boet y e orden pa bay paga e nummerplaat di biaha na bo cas, cual ta baha e gastonan di Gobierno, di control di autoridad y tambe con cu wak’e, ta un persona cu no a logra pag’e, aunke por bisa cu ta manera forsabo pa bay page, pero si bo wak’e e bon. Ta manera pa yudabo pa bo cumpli cun’e. Tin hende ta lubida di page of e no a logra yega na tempo. En todo caso esaki lo yuda y ta un manera pa yuda belasting hopi mas pa cumpli cu e heffingnan aki.
Ta bay tin vrijstelling riba bicicleta cu tin motor di coriente, scooter cu motor di coriente. Tur esaki ta cay den e parti di Green Technology, segun Rasmijn, cual ta algo positivo. A mira caba cu tin algun hende ta core cu scooter riba bateria y den un trafico pega e ta yuda hopi bon. Si bo ta un persona cu ta traha den Playa unda cu trafico ta stagna, y bo kier para bo auto mas leu, bo a evita hasta e pago di Aruparking, bo ta par’e mas leu, bo ta saca bo scooter y ta core bin den caya cun’e. Ta algo practico y ta yudabo move hopi mas lihe y no ta trece e drukte den caya tampoco y bo no mester paga number riba dje.
Otro cosnan cu lo bin cun’e ta cu tambe tin pensa di bin den futuro cercano cu bo ta pone mas informacion riba e sticker. Awendia tin barcodes cu por haci hopi cos cun’e. Hopi informacion por wordo poni riba dje. Por ehempel informacion pa paga belasting, cu bo a paga bo seguro, nummerplaat ta na ordo y ken ta e doño di nummerplaat. Tur esaki por wordo poni den un barcode of den otro sistemanan cu bo por scan y haya tur informacion. Tur esakinan ta cosnan cu tin pensa di bin cune den futuro cu ta cosnan positivo y e nummerplaat si por bisa cu ta buscando manera pa bin cun’e. Un sistema cu e nummerplaat ta keda valido pa cinco aña riba un manera pa pega mas fuerte riba auto, no manera awo cu un schroefdraaier. E discusio ta keda cu bo ta mira pais Corsou a mantene e nummerplaat riba e auto. Na Aruba nos no ta dje leu ey pasobra sa cu e nummerplaat hopi hende tin algo mas personal. Por mira cu pueblo no ta cla pa esey of nunca lo ta cla pe. Esaki ta un otro solucion, segun Rasmijn.