Donald Trump a emiti un decreto unda cu e ta ordena pa suspende pa 18 luna deportacionnan di venezolanonan den e pais. E decision aki a wordo tuma pa e ainda mandatario, algun ora prome cu e mester bandonan su cargo como Presidente di Estados Unidos.
E Gobierno di Trump a recorda e sancionnan cu a keda imponi di nan parti contra e regimen Chavista, y a reconoce Juan Guaido como Presidente interino di Venezuela. “e situacion di deterioro den Venezuela, cu ta presenta un menasa permanente na siguridad nacional y na e bienestar di e pueblo Mericano, ta hustifica e stop na deportacion di ciudadanonan Venezolano cu ta presente na Merca”.
“Conforme cu mi autoridad constitucional pa conduci relacionnan exterior di Merca, mi a determina cu e ta na interes di nos politica exterior den diferi e expulsion di cualkier nacional di Venezuela, of di cualkier persona cu a residi na Venezuela”, ta parti di e contenido di un carta firma pa Donald Trump.
E medida ta exclui esnan cu dicidi di bay Venezuela bek voluntariamente; esnan cu no a residi na Merca di forma continuo for di 20 di januari 2021; esnan cu tin cargo penal na nan nomber; esnan cu a keda deporta prome; esnan cu ta wardando un proceso di extradicion; esanan cu nan presencia ta forma un menasa pa siguridad nacional, segun e keda determina pa autoridadnan Mericano; y esnan cu nan presencia tin potencialmente un efecto adverso na e politica internacional di Merca.