Artista visual Steffen Maas a duna biblioteca diferente pakete di wega pa mucha. Weganan cu Steffen a crea. Cada pakete ta consisti di un wega di domino, un wega di memory y un wega di kwartet. E imahennan ta e mesun cu a publica den ‘Mi buki di Aruba’. Mi buki di Aruba ta ofrece muchanan di Aruba imahennan reconocibel di nan mes contexto cultural y medio ambiente.
E weganan ta ofrece imahen riba diferente topico, manera cuminda y custumber di Aruba, naturalesa y paisahe di Aruba. E wega ‘ArubABC’ ta mustra varios parha, fruta, mata, instrumento musical, sitionan y monumentonan conoci di Aruba. E material ta masha colorido y atractivo. Mucha ta reconoce e imahennan facil y alabes ta siña lesa leter, e palabra of nomber. Steffen Maas a crea e weganan enfocando riba mucha mas jong cu ta siña lesa, pero por usa e weganan pa mucha di tur edad y tambe den klas.
Banda di produci e publicacion ‘Mi buki di Aruba’ tabata Steffen su meta pa desaroya materialnan adicional pa complementa e buki, por ehempel weganan di grupo, buki di ehercicionan y aplicacion digital como metodo di enseñansa.
Pa por a ehecuta e proyecto ABC, Steffen Maas a ricibi un subsidio di Prins Bernhard Cultuurfonds Caribisch Gebied (PBCCG). E proyecto ta wordo apoya door di ‘World Literacy Foundation’.
Pa conoce e proyecto completo por bishita https://www.abcbooks.org/news
