Cuerpo Policial Aruba ta di hubileo pa dos agente cu ta celebra 30 aña di servicio na comunidad pa medio di nan trabao como polis. Durante un encuentro ameno a honra Dominico Werleman y Arsenio Murray pa nan añanan di servicio den e cuerpo di Polis.
“Awe mainta nos tabatin e entrega di e documentonan na dos colega di cinco total — pero pa motibo di salud tres no por tabata presente — honrando nan pa 30 aña di servicio. Esaki ta un logro grandi. Mas ainda ora mira e organisacion compleho di cuerpo policial,” asina Mr. Adolfo “Dolfi” Richarson a cuminsa bisa relaciona cu e logro aki.
E ta sigui bisa cu a suplica Dominico Werleman y Arsenio Murraypa sigui duna e guia necesario pa asina esnan cu a bin despues por sigui carga e trabaonan di un organisacion manera esun aki… “mirando cu e cuerpo ta uno hoben y nos lo kier pa e dos coleganan aki pasa nan experiencia over na e coleganan mas hoben.”
“E ambiente awe mainta tabata uno di hubilo y tur hende tabata contento pa colega Werleman y Murray. Tin cu bisa acerca cu nan tabata hopi agradecido y honra cu nan por a sirbi e comunidad y pais como polis,” asina Alto Comisario Richarson a sigui bisa.
Dominico a cuminsa su trayectorio como polis dia 5 di januari 1987 — 30 aña pasa — cu e segun e ta hopi aña pa un persona mantene na e mesun trabao kedando leal na e cuerpo, dedicando un gran parti di bo bida na e trabao. E ta sigui bisa cu desde jong bo ta siña…“y awor na grandi ainda bo ta siñando dedica na e parti teoretico y pas’e den e parti practico y esey ta un trayectorio basta largo y keto bay bo ta sigui siña. Kiermeen nunca e ta stop. Awor mi no falta mucho mas pa bay cu pensioen. Pa ta exacto falta shete aña mas, e ora ta bira mas aña di servicio ainda.”
“Awor ta tempo pa mi cuminsa pasa mi experiencia over pa e coleganan polis cu ta jong cu kier siña y unda cu mi ta — den e departamento maritimo mi ta bay haci di awor en padilanti,” e ta agrega. Su conseho pa esunnan cu lo kier bira polis ta pa cuminsa cu un bon estudio.“Dedica y ser bo mes anto ora bo bay scol di polis y caba wak pa e respet. Duna respet y haya respet asina bo lo logra exito den bo carera pa futuro,” e ta accentua. Dominico actualmente ta den posicion di Burgerrang y ta eherce su trabao den e departamento Maritimo.
Arsenio Murray cu awe ta “chef van Dienst”na warda di polis na Shaba y ta trahando actualmente como recherche na Strand Politie ta bisa cu 30 aña ta un carera hopi largo, un bida largo. “Mi ta corda tempo cu Aruba a haya su Status Aparte na ’86 net despues cu mi a solicita pa bira polis, mi a cuminsa na ’87 trahando na warda di polis San Nicolas. Despues mi a bay pa e prome boto di polis cu tabata PB1 y asina a sigui pa departamento di trafico y despues recherche,” e ta elabora riba su trayectorio como polis.
Arsenio a traha na diferente departamento di cuerpo policial cu diferente chefnan y e ta bisa cu bo ta siña conoce hende den e comunidad y bo ta ripara con e ta cambia den tur e añanan.
“Bo mester por aprecia loke bo ta bay haci pa comunidad pasobra bo ta bay duna hopi di bo parti sin haya nada bek y bo mester por siña biba cu esey,” ta su conseho pa e hobennan cu aspiracion pa bira polis.