ROMA, Italia- E cas di moda Dolce & Gabbana ta wordo acusa di discriminacion na China pa motibo di su campaña di mas reciente. Den e klip un modelo cu aparencia Asiatico ta purba di come cuminda Italiano, e.o. spaghetti, pizza y cannolo, cu’n palito.
https://www.instagram.com/p/BqSVTskiM1n/
Riba rednan social di China usuarionan ta haya cu e campaña aki ta ofensivo. “Ta casi 2019, mi no ta compronde con un marca reconoci manera esaki ta haci uzo di stereotiponan asina y ta purba haci un joke di dje”, un usuario a scirbi. “Mi ta contento di cu e pueblo Chines ta lanta y defende su mes contra di e tipo di discriminacion aki”, otro usuario a scirbi.
E campaña ta menasa di daña e reputacion di e cas di moda aki: Dolce & Gabbana a cancela un show di moda cu tabata planea pa diaranson anochi despues di cu famosonan a menasa cu’n boycott.
Loke no ta yuda den e caso aki, ta e reaccion di e diseñador Stefano Gabbana, of den todo caso, cu a parce di a duna, riba un keho di un usuario di Instagram cu a keha di e clip. Eyden lo el a scirbi cu e lo no ta compronde dicon Chinesnan ta sinti nan mes discrimina door di e comercial. Tambe tabata tin insultonan aden.
E otro mita di e cas di diseño a bisa di cu su cuenta personal y esun di e Cas di Moda a wordo gehack y cu no ta su persona a haci tal remarcanan. E marca a ofrece su disculpa pa e problema cu e mensahenan a causa.