MADRID, Spaña- Ministerio Publico di e provincia Spaño di Castellon a habri un investigacion contra di un hospital pa e amputa e pia di un baby , ora cu esaki tabata interna door cu el a nace prematuramente. E investigacion ta riba peticion di e Asociación Defensor del Paciente, cu a solicita un investigacion ariba e caso aki.
E mayornan a relata na e asocacion a trabes di un carta cu e mama di e baby tabata tin dificultadnan durante e di 23 siman di embaraso y a haya yiu pa medio di cesarea den e di 25 siman. Door cu e mucha tabata prematuro, el a keda interna den Hospital General de Castellon.
Entrante e di 28 dia, e criatura a cuminsa bira malo, pa cual e dokternan a pasa dos dia ta busca ader na su bilnan. Ora cu porfin nan a dicidi di laga e mayornan drenta, nan a wak cu e mucha tabata tin marcanan blauw na su pia, y despues e hefe di e departamento di pediatria a papia cu e mayornan y a bisa nan textualmente: “nos a kiboca”, haciendo referencia na e tantisimo marcanan di hangua cu e mucha tabata tin na su pia drechi. Y e dokter a admiti, cu “nan a comete un eror”.
Al parecer, buscando un ader e dokternan a bora un ader y esaki a cera, strobando e circulacion di sanger. Asina mes e specialista vascular no a bishita e baby pa casi un siman, tempo den cual e pia a keda tapa y a bira casi biña. En un principio el a pensa cu solamente lo tabata necesario pa amputa e punta di su dedenan, pero despeus a bay over na amputa 10 cm bou di su rudianan.
E presidente di e Asocacion, Carmen Flores, a solicita cu e hospital y e dokternan wordo persigui penalmente den un caso unda cu nan ta denuncia tambe cu e baby a wordo duna un remedi caduca (Ventolin) y cu na varios ocasión a mishi cu e menor, sin cu nan a desinfecta nan mannan.