Dokternan di cas ta haya bishita di hopi pashent diabetico, ta un di e enfermedadnan cronico cu mester hopi atencion, pero tambe e parti di trahamento integral. Durante Health Care Conference Aruba 2017 a trata e topico aki unda cu a pone hopi enfasis riba enfermedadnan cronico. E participantenan mester a pensa con ta anda cu e enfermedadnan cronico.
Dokternan mester a haci esaki na un manera realistico y mester a pone atencion riba no solamente e enfermedad so pero tambe riba e pashent pa sa con nan ta experencia e enfermedad den nan bida diario. Dokter di Cas, Dr. Sharline Vis hunto cu tur esunnan presente den e conferencia di HCCA a sigui haya informacion con nan mester trata cu cada pashent individualmente, pasobra no ta tur hende tin di e mesun cuido. Tin persona mester di mas cuido cu otro y esaki a pone cu nan mester a pensa con pa soluciona diferente reto, e diferente problemanan cu nan ta topa den e sintomanan di pashentnan.
“E conferencia aki no solamente a yuda pa ta consciente y mira con grandi e problemanan ta, pero tambe e tabata hopi importante pa topa otro hendenan cu tin mas experiencianan tambe na otro pais”, Dr. Sharline Vis a indica. Durante e conferencia nan a haya sa mas con e paisnan ta trata enfermedadnan cronico.
Informacionnan cu a suministra a habri wowo pa varios tratamento cu por uza aki den salubridad.
Aruba ta riba e bon caminda caba, pasobra a traha un protocol pa trata e pashentnan diabetico. Dokternan di cas ta uza e mesun manera di traha pa asina tur pashent diabetico haya e mesun cuido y esun cu nan mester. Ta importante pa duna pashentnan e mensahe na un manera uniforme pasobra tur dokter di cas mester comunica riba e mesun linea cu e pashent y no diferente. Awo cu dokternan tin filenan electronico, ta hinca tur data den e dossier di e pashent y tur informacion dokternan por saca bek y monitor e cuido di e pashent.
Dokternan di Aruba ta trahando integral, pero nan no ta haci’e na un manera completamente structural ainda. Dokter di Cas, Dr. Benita Britt-Croes tabata preparando pe presentacion di e conferencia di HCCA y el a ricibi hopi “inside” riba loke nan ta haciendo. “Nos a haya hopi inside den kico nos no tabata haci bon y nos tin logro aworaki door di haci practica integral na un manera corecto”, Benita Britt-Croes a comenta.
E teoria ta e basico pe dokternan y ora di sali for di e teoria ta bira un herment cu nan ta uza pa logra metanan. E metanan di dokternan ta pa hendenan, esta pashent y e poblacion, pasobra dokternan no ta pensa solamente riba e hende individual pero ta pensa riba e poblacion general.