No ta un secreto mas cu tin un lista cu datonan personal di personanan cu lo a test positivo pa COVID-19. Claramente ta un kiebro di confiansa y confidencialidad di paciente cu a tuma lugar na momento cu un lista di mas o menos 20 pagina cu nomber, adres y fecha di nacemento, ta circula y keda den dominio di practicamente cualkier persona.
Den dicho lista por a tuma nota di bastante nomber di personanan reconoci den nos comunidad y un di e personanan ey ta un dokter internista di renombre na nos isla. E dokter aki a sali bin dilanti y entrega un keho oficial contra e instancianan encarga cu distribucion di dicho lista, pero mas tanto pa e motibo cu e mes a test negativo 2 biaha pa COVID-19 y asina mes su nomber a bin riba e lista, cual a ocasiona daño funesto pa su praktijk, famia, amigonan, trahadornan y hasta conocir.
Cu permiso di e specialista aki, nos ta publica su carta caminda e ta detaya su motivacion pa entrega un keho na autoridadnan pertinente.