ROTTERDAM, Hulanda- “Mi a wak un potret di e dokter tempo e tabata jong y mi a curpa a grima”, segun Joey Hoofdman, un homber hulandes di 30 aña.
E potret cu el a wak tabata di Jan Karbaat, tempo cu e tabata jong, un dokter Hulandes cu a muri algun siman atras y cu ta wordo acusa di presuntamente a uza su mesun sperma pa tratamentonan di inseminacion artificial.
Te cu awo 18 persona a confirma nan sospecha, door di haci un test di DNA cu un di e yiunan di e dokter.
Karbaat tabata hefe di un clinica conoci pa tratamentonan di fertilidad na Rotterdam cual el a dirigi for di 1980 y cu a cera su portanan na 2009. Akinan miles di muhe a busca yudansa pa logra haya un yiu.
Prome cu esey ela traha den un hospital durante e decada di 1970, un periodo unda cu ta wordo sospecha cu e por a cambia muestranan di semen cu esun di dje. Un demanda hudicial di 25 persona presenta e luna aki ta busca pa aclaria si Karbaat a uza su mesun sperma den e tratamentonan, na luga di esun cu su pashentnan ta uza via un catalogo di donante.
Autoridadnan d hospital Zurid, e actual Maasstad, diadomingo tambe a confirma cu nan a habri un investigacion.
Un hues lo mester dicidi dia 2 di Juni si lo realisa e pruebanan di DNA cu e demandantenan ta pidi pa aclaria e paternidad biologico di homber y muhenan cu a wordo concebi den e clinica durante tres decada.Karbaat a muri na edad di 89 aña na April y den su testament e ta manifesta su negativa pa cu nan tuma su muestranan di DNA, y esaki ta den man di husticia awo. Esaki ta un caso cu ta inkieta Hulanda.
Aunke e parecido fisico ta grandi, Joey Hoofdman a bisa den un entrevista na television cu ainda e no ta sigur si e dokter Karbaat ta su tata. “E por ta mi tata, pero mester warda ariba e pruebanan di DNA. P’esey ta asina importante pa e caso wordo trata”.
Fuente: www.bbcmundo.com