DEN HAAG, Hulanda -Un dokter cu a droga un muhe di 74 aña cu’n sedante den su bebida, prome cu administr’e un droga mortal, mientras cu su famia tabata want’e abao, lo bira e prome dunado di cuido cu lo wordo persigui pa a viola e ley di eutanasia.
MInisterio Publico na Den Haag a manda un comunicado caminda cu e ta informa cu e dokter a yega na e conclusion eroneo cu e pashent tabata kier a muri.
E caso aki ta e prome caso di persecucion di un dokter desde e ley di eutanasia a bin na vigor na 2002. E ley di eutanasia ta permiti pa un persona dicidi pa su mes cu e kier muri, den caso di sufrimento extremo y cu explicitamente a informa di su decision pa muri.
E pashent den e caso ak tabata den un cas pa anciano y tabata sufri di demencia pero cinco aña prome el a firma un documento caminda cu e ta informa cu e lo kier eutanasia si na momento di e ehecucion e ta mentalmente apto na momento di su ehecucion.
Fiscal a bisa cu e muhe a duna declaracionnan conflictivo tocante su deseo pa cu e decision y su estado mental a deteriora na momento di su morto.
E dokter secretivamente a pone un sedante den su koffie durante un reunion mas trempan cu e pashent y su famia, segun un informe di e Hunta di Kehonan Medico, e fiscal a bisa.
E muhe a haya soño pero e no a bay drumi, pa cual un di dos dosis di e droga a wordo administra na dje pa medio di un injeccion, pero e muhe a sinti dolor ora cu e dokter a hinca e hangua.
Unabes cu el a pega soño, e dokter a purba di administra un dosis letal di un otro droga, pero e muhe a lanta bek.
“Famia di e pashent a yuda e dokter door di wanta e pashent y e dokter a adminsitra e resto di droga den pura”, segun un informe di e incidente.
Nomber di e dokter en cuestion no a wordo nombra, pero el a wordo haya culpabel di a kibra e richtlijn den tratamento di e pashent e dia di su morto y a “pasa e barera”, segun e hunta di kehonan medico.
“Despues di un investigacion exhaustivo, Ministerio Publico a yega na e conclusion tambe cu e dokter di e asilo pa anciano no a actua dentro di e standard legal”, Ministerio Publico a bisa.
“Ministerio Publico ta considera importante pa e corte evalua si e dokter tabata tin e derecho di basa su mes ariba un documento firma dor di e muhe en cuestion. Adicionalmente, Ministerio Publico ta reprocha e hecho cu e dotker a asumi cu e muhe ainda tabata kier a muri, sin verifica esaki cun’e”.