LARKANA, Pakistan- Segun autoridadnan sanitario, e dokter tabata injecta remedi cu’n solo hangua. E dokter en cuestion tambe tabata tin HIV.
Al menos 90 persona, incluyendo 65 mucha, a wordo contamina cu HIV den e sur di Pakistan despues di cu’n dokter a uza un hangua contamina, segun informenan.
“Nos a detene un dokter”, Kamran Nawaz, hefe di polis di Larkana, Pakistan, caminda e contaminacion a tuma luga, a declara na AFP.
“Segun autoridadnan sanitario, e dokter tabata injecta remedi haciendo uzo di un solo hangua”, Kawaz a splica y el a agrega cu e dokter tambe tabata tin HIV.
Un documento di polis den poder di AFP ta establece cu’n clinica ta “fuente di e difusion di e malesa”, sin duna mas detaye si e dokter tabata traha na dicho clinica.
Autoridadnan a wordo alerta pa prome biaha siman pasa, despues di cu 18 mucha cu ta biba den cercania di Larkana nan test a sali positivo pa e virus di AIDS, pa cual responsabelnan di salud a efectua analisisnan mas amplio.
“Mas di 90 persona”, incluyendo 65 mucha, a resulta ‘seropositivo”, e dokter Abdul Rehaman a declara na AFP.
Un di dos persona encarga cu e sistema di salud a confrima e contaminacion aki, pero a duna cifranan ligeramente diferente.
E dokter en cuestion a wordo deteni.
Pakistan ta un pais cu masha poco caso di AIDS, y esaki ta den subida door di trahadonan sexual, adictonan y inmigrantenan di paisnan di Golfo Persico.