Den un entrevista cu presidente di SIMAR Sra. Sheila Tromp ta splica cu cada dia e desaroyonan y preocupacion den enseñansa ta sigui crece pa cual SIMAR a hay’e ta sostene e docentenan pa loke ta e tema di calor y e necesidad di airco na schoolnan
Sra. Tromp a bisa cu su persona como cabesante di Pius X, e mes a bib’e ora cu su maestronan a pone trabao abao, caminda cu no solamente e calor ta hunga un rol, pero na Pius X bentananan no ta habri. Esey a pone cu hopi otro scol a dicidi di lanta para y bisa cu nan scol tambe e problema ta existi. Awendia tin un ola di calor, cu no tabata tin antes.
Miembronan a pidi un reunion di urgencia, caminda miembro y no miembro por a asisti. Akinan a scucha kico tur tabata nan preocupacion ariba diferente otro tereno, specialmente ariba e parti di airco, di calor, di e situacion di siguridad na scol. A bin dilanti pa lanta un comision, ya cu en principio e miembronan di directiva ta personanan cu ta traha henter dia den veld, cu no por carga esaki nan so.
A dicidi pa lanta un comision y a dicidi pa bay cu un accion di firma cu lo termina otro siman, cu ta pidi tur e scolnan, cu e diferente directivanan cu airco of sin airco, e ta un idea cu ta tur hende ta para tras di dje. Manera cu ta exigi di e muchanan, pa nan tin e miho enseñansa y duna di miho di nan mes, nan mester ta den un ambiente unda cu nan por concentra tambe.
Docente a para ariba cu nan ta cuminsa cu accion di firma, pa despues bay sinta cu e siguiente minister di enseñansa y wak con lo bay trata esaki.
Tin diferente scol cu a haci e trabao di antemano caba, a laga haci diferente test di yama companianan bin check nan coriente,; hopi scol a cuminsa prepara caba. Esey ta loke SIMAR ta haciendo, compilando di diferente scolnan kico ta e trabaonan cu e scolnan a haci ariba nan mes of hunto cu e comision di mayor. No ta logico pa pidi airco awe y ya mañan nan tin. Pero si ta para tras di e idea unda cu nos scolnan na Aruba mester yega, segun Sra. Sheila Tromp, presidente di sindicato SIMAR.