Docentenan di SPO a duna minsiter di enseñansa te dia 21 di juni pa duna claridad riba e ‘fusering’ di SPO

Dialuna atardi sindicato SIMAR y SEPPA a yama un reunion cu Minister di Enseñansa riba preocupacion di docentenan pa cu e decision di uni e SPO-nan (Scol Practico pa Ofishi) den un solo edificio, bou di un solo dak. Pero e reunion aki no a duna resultado. Un pa un e maestronan a cuminsa bandona e reunion, cu a cuminsa un poco despues di 4’or di atardi y na cual a invita tambe miembronan di Parlamento. Sra. Josephina Albertus, presidente di Sindicato SIMAR ta amplia mas ariba e reunion aki.
Sra. Albertus a cuminsa na bisa cu dialuna e docentenan por a expresa nan preocupacion cu nan tin tocante e situacion di SPO. Dia 31 di januari caba, ora cu SIMAR a sinta hunto cu nan cu minister, tabata tin e preocupacion di fusering, unda cu e minister kier a haci di dos scol, un solo scol. Pero nan ta mira dianan ta pasa y aña escolar ta finalisando, y ta parce cu e palabracionnan haci, not a wordo honra y sin ningun splicacion di banda di e mandatario.
E docentenan a presenta un Powerpoint unda cu nan a mustra cu un solo scol no ta bay logra, mirando cu ta hopi mucha cu rugtas, cu tin extra baggage cu nan, ta bay pone nan den un edificio cu eigenlijk no ta grandi suficiente pa tur mucha. Falta cierto cosnan den e edificio nobo cu nan lo mester pa por duna un enseñansa di calidad. P’esey nan ta pidi minister pa warda cu esey, duna un chens na e mesun scol cu nan ta aworaki, pa nan haci cierto cambio chikito cu ta buta cu nan por draai cierto les di calidad. Ora nan bay Brazil, esey lo no ta posibel. Tambe tin muchanan cu ta biba na Noord y lo mester bay te Brazil pa haya les. E lokaalnan ta hopi chikito pa e cantidad di mucha. Varios punto cu nan a duna cu a mustra cu e edificio na Brazil no ta apto pa e cantidad di mucha cu mester ta na Brazil pa otro aña.
Muchanan cu ta bay SPO ta muchanan cu mester di atencion special. Cierto docentenan a expresa cu tin di nan tin 14 mucha den klas, cu ta mucho hopi pa duna e atencion cu nan mester. E scol nobo na Brazil lo no ta grandi suficiente pa tur mucha. Muchanan cu ta di Santa Cruz y Savaneta ta di un otro bario. Nan no conoce otro y mirando cu e muchanan mester stabilidad, ya cu awo ta pone nan hunto den un edificio, cu pa e muchanan ta fastioso mirando cu nan mester adapta nan mes y no tin espacio suficiente pa nan por haci esaki.
Tampoco e edificio na Brazil no tin un gymzaal, con ta bay facilita nan pa esey. Ta cosnan cu ta bin acerca cu no a pensa ariba dje cu ta bay trece problema pa e docentenan.
Algo asina ta bay bira pisa pa e docentenan ora muchanan di Santa Cruz y Savaneta ta bay traha hunto, y mirando cu e espacio no ta grandi suficiente, no tin e luga adecua pa nan por deal y handle cu e situacion asina.
E minister en cuestion a pidi e docentenan di SPO un tempo, te dia 21 di juni proximo, y e docentenan tin 3 pregunta pe docente. E prome ta si e fusering ta sigui, cu e siguiente aña escolar tur dos SPO lo bay den un solo edificio. E di dos ta trata e curiculo, cu a wordo palabra cu nan cu nan lo wordo envolvi den dje y pa awo e docentenan haya tende cu esaki ta cla, dus nan kier wak e curiculum. E di tres, a compronde cu na Santa Cruz, e director lo no ta bay t’ey pa otro hende, cu si esaki ta bay ta un vacatura, cu e docentenan por aplica pe.
E docentenan a bisa cu si e minister bin atrobe y purba impone esaki ariba dje, e situacion por escala. E docentenan ta sperando te maximo dia 21 di juni, ariba un contesta di e Minister di Enseñansa.
Por ultimo, Sra. Josephina Albertus a bisa cu e ta contento cu tanto sindicato SIMAR como SEPPA tabata presente na e reunion y cu ta spera pa dia 21 e minister tin un contesta pa nan.
Si e ta contento cu e minister a presenta na e reunion, el a scucha e preocupacion di e docentenan, y ta spera ariba e contesta pa dia 21 di juni proximo.

Comments

comments