A toca Scol Paso Pa Futuro e honor di tin den nan ekipo di docentenan, no 1, sino 2ganado di Appel di Oro, e premiacion di excelencia den enseñansa. Dienst Publieke Scholen, DPS, cu ta e schoolbestuur bao di cual e scol ta resorta, a organisa un atardi ameno pa celebra e 8 ganadonan di Appel di Oro cu ta traha na scolnan cu ta cay bao di DPS.
Entre e invitadonan tabatin juffrouw Mey Wong y juffrouw Angelique Trimon, respectivamente “vaste invaller” y “klassenassistent” na Scol Paso Pa Futuro.
Juffrouw Mey a haya hopi leuk cu DPS a organisa un encuentro den nan honor. E nominacion mes pa un Appel di Oro tabata un sorpresa, Juffrouw Mey a laga sa, despues a bin e otro sorpresa, pues cu el a gana den su categoria. E ta agrega cu e ta haya hopi bon cu Minister Michelle Hooyboer-Winklaar a dicidi di haci algo asina pa reconoce esunnan cu ta haci hopi den enseñansa y e ta spera cu e trend aki ta algo cu lo sigui.
E aprecio extra cu DPS a demostra pa e docentenan pa loke nan ta haciendo na e scolnan, tabata un sorpresa extra y a wordo hopi bon ricibi.
Juffrouw Angelique a comenta cu e no a spera ni e nominacion, ni e premio y ni tampoco e evento organisa pa DPS y ta un experiencia great, un “feeling asina nice” ora cu un persona ta wordo aprecia asina.
Finalisando el a bisa cu el a keda hopi contento particularmente pa e recepcion cu nan a haya dialuna na scol despues di a ricibi e Appel di Oro. Tur e alumnonan tabata wardando nan yega scol, pafo para y despues den klas tambe e studiantenan tabata hopi entusiasma.