Diahuebs ultimo docentenan di C.G. Abraham de Veer school a tene nan “studiedag”. Pa esaki nan a acerca Museo Arqueologico Nacional Aruba (MANA) pa yuda organisa un excursion pa e docentenan. E cabesante di dicho scol tabata hopi interesa den organisa un dia educativo y alabes divertido. Pa e docentenan por a haya informacion tocante di historia, cultura y tambe arkeologia di Aruba. Por bisa cu riba e dia aki e docentenan a haya informacionnan hopi valioso y asina por transmiti esaki bek pa nan alumnonan.
Despues di a haci un introduccion, e docentenan a subi e bus pa asina hunto cu señor Dufi Kock pasa na e sitio di e graf di Commanduer na Savaneta unda cu nan a haya un splicacion amplio di e historia di e commandeurnan cu a biba y ser dera na Aruba. E rumannan Werleman cu ta biba banda di e sito, a intercambia nan storia cu e docentenan y a conta nan experencia di tempo nan tabata mucha tocante e grafnan aki.
E tour a continua pa e Watertoren na San Nicolas unda cu Museo di Industria ta ubica. Akinan e docentenan a haña un guia di señora Mariana Paula cu a duna un splicacion amplio di tur e industrianan di Aruba. Docentenan a keda fascina cu e edificio restuara y tambe cu un exposicion asina bunita cu ta conta e historia di nos industrianan na Aruba.
A sigui pa Museo di Comunidad. Akinan algun di e docentenan a opta pa cana mientras e otronan a sigui cu e bus. Señor Roy Feliciano tabata warda e grupo pa asina e guia y mustra e docentenan hopi di e artefactonan di antes. Akinan tabata parce cu a bai bek den tempo. E artefactonan a pone tur hende rebiba un periodo cu tabata den olvido.
E ultimo stop pa e tour aki tabata na e sitio arkeologico cu yama Manzania. Akinan e docentenan mester a ‘hike’ un parti pa por a yega e sitio pa asina admira un parti di Aruba cu no ta conoci pa hopi hende. Hiram Angela, e asistente arkeologo, a duna un splicacion tocante e pinturanan cu tin riba e barancanan y tambe e importancia di cada un di nos comunidad pa sigui proteha y cuida nos sitionan arkeologico pa nos futuro generacionnan.
E docentenan di C.G. Abraham de Veer school a haya informacion diverso y extenso di nos herencia cultural. Awor nan lo por bai transmiti e informacionnan aki pa nan alumnonan pa asina sigui engrandece y proteha nos herencia cultural.
Un gradicimento ta bai pa señor Dufi Kock cu a pone su tempo disponibel pa compaña e docentenan riba e expedicion herencia cultural. Tambe na Fundacion Museo Arubano (FMA) cu a ricibi y guia e docentenan den e 2 museonan na San Nicolas. Na e guianan señora Mariana Paula y señor Roy Feliciano pa cu e 2 museonan aki. Na e cabesante di C.G. Abraham de Veer school Juffrouw Jane Hooft pa a confia den Museo Arqueologico Nacional Aruba.