CALIFORNIA, Merca- Studiantenan cu a presencia e escena a sigura cu e maestro a pidi e alumno pa e sali for di klas, pero e mucha a contest’e bek fresco.
Siguramente, den algun ocasion di bo bida studiantil bo a yega di ta fout door di drenta klas laat of pa no tin uniform bisti. Y aunke esaki tabata duna mal beis, no tabata tin otro opcion di keda keto y acepta e ‘castigo’.
Sin embargo, tin hende cu tin problema pa acepta un ‘no’ como respuesta.
Recientement un klas di un scol secundario na California a conberti den un ring di boxeo despues di cu’n alumno a insulta e meneer di muziek cu a hala su atencion.
Segun e relato di e studiante, e menor a lansa palabranan di insulto den direccion di e maestro, cu a provoca cu e homber a perde cabes y cuminsa golpia e alumno.
Un video graba pa otro alumno ta mustra Marston Riley, di 64 aña halando e studiante di 14 aña cu mokete, mientras cu’n muhe cu vest geel bisti y otronan a purba interveni pa stop e agresion.
E alumno, cu a wordo hospitalisa cu lesionnan di caracter moderado, ya caba a bay cas, segun e Departamento di Comisario di e Condado di Los Angeles.
https://youtu.be/UIvjaEL-w5I
Di otro banda, Riley a wordo laga liber diasabra despues di a paga un fiansa di 50 mil dollar y lo mester presenta den corte dia 30 di november proximo. Mientras tanto, autoridadnan ta sigui investiga e suceso.
Aunke hopi ta e tatanan di famia a rabia pa e sucedido, otronan ta apoya e homber y incluso a crea a pagina di GoFundMe cu e obhetivo di recauda fondo pa paga e gastonan legal. Te cu awo, a logra recauda mas di 32 mil dollar.
Segun informacion di CBS Los Angeles, donantenan a argumenta cu e maestronan tambe tin “mester siguridad y cu niun maestro mester soporta e abuso verbal”, agregando cu e studiante “tambe mester a wordo deteni”.