KAAPSTAD, Surafrica- Lesnan a keda cancela na un scol Surafricano, acusa di segregacion racial. Esaki ta bin despues di cu e imagen di un klas cu muchanan blanco y di color scur sinta na mesanan apart a bira viral, causando un molester grandi na e pais.
Segun e canal di television, Enca, e actividad a wordo suspendi den e centro Laerskool Schweizer-Reneke, ubica den e provincia noordwest di Surafrica, mientras cu autoridadnan local ta investiga e incidente. E polemica a cuminsa e siman aki door di e difusion di un potret di un di e klasnan, caminda cu por mira muchanan color blanco sinta na un mesa largo, mientras cu e cuater alumnonan color scur tabata sinta na banda patras, na un mesa apart.
E imagen a wordo comparti cu e mayornan door di e mesun docente (cual identidad no a wordo revela, aunke cu autoridadnan local a bisa di cu e docente a wordo geschorst) den un chatgroup di whatsapp.
Racismo presente
E alumnonan aki ta pertenece na e klas R (entre 5 y 6 aña) y, despues di e polemica, e scol a bisa cu ta trata no mas di un division den grupo di alumno cu sa papia Afrikaans. Mayornan di e cuater muchanan cu a wordo poni apart, y den e comunidad negro di e zona, sin embargo, ta sigura cu racismo te ainda ta fuertemente presente den e zona.
“Tur loke mi a wak tabata mensahe di mayornan di rasa blanco bisando ‘danki, danki’ (despues di cu e imagen a wordo manda den e chatgroup_, pero niun hende tabata bisa nada tocante e separacion di alumnonan”, mama di un di e muchanan a conta na e portal Surafricano TIMES. Aunke a pasa casi un kwart siglo desde e yegada di democracia na Surafrica, e pasado di segregacion racial ta latente te ainda den hopi sector di e sociedad y racismo ta un tema di sensibilidad publico. E sistema di segregacion di ‘apartheid’ a mantene su mes oficialmente den e mayoria di rasa negro someti na e minoria blanco for di 1948 te cu comienso di e decada di 1990.