Manera anuncia, Universidad di Aruba lo lansa e aña aki nan Open-Day virtualmente riba 5 di November entre 5.45pm pa 8.30pm uzando plataforma digital pa comparti informacion pa studiante, mayor y cualkier cu kier sigui studia na Aruba pa haya tur informacion rekeri. Bo por registra pa esaki riba www.ua.aw.
Universidad di Aruba ta ofrece 9 programa [degree programs] y un diverso rango di programanan extracuricular y orienta riba carera promoviendo salud y crecemento personal. Studiantenan tambe tin oportunidad pa studia afo cu e Global Erasmus partners. Durante e Virtual Open Day, bo ta haya oportunidad pa bishita virtualmente areanan di informacion, download brochure, acceso na videonan y chat tambe cu studiantenan y staff.
Docente na FEF [Finance & Marketing], Marushka Andrews, specialisa den programa marketing ta splica cu e aña aki sigur tabata un aña di reto pa nos tur. “No solamente pa docentenan y studiantenan na FEF pero pa full comunidad academico. Na universidad nos mester a adapta nos manera di duna les. Pues enbes di duna les fisicamente, nos mester a prepara nos mes den un temporada masha corto pa duna les Online, y pa purba mantene tur studiante den klas Online”, segun sra. Andrews.
Como docente cu ta duna les di marketing, e reto di mas grandi segun sra. Andrews, riba e parti Online tin biaha bo ta perde e actividadnan cu bo ta haci fisicamente. Hopi biaha bo tin dus e actividadnan di teoria den klas, y otro biaha tambe ta bay pafo di klas pa studiantenan experiencia e parti di mercadeo, bishita companianan etc y ora bo ta Online esaki ta mas limita. Den tercer aña di FEF, studiantenan ta haya digital marketing y nan sa e importancia di adapta Online/Offline platforms, y con pa haci propaganda, mirando e compania su necesidad y adapta esey pa loke ta uzando diferente plataforma di media. “FEF no ta solamente marketing, bo ta siña accounting y financia. Nos facultad ta e di dos cu a cuminsa na Universidad Aruba, y nos tin un trayectorio positivo pa loke ta nos graduadonan ,” sra. Andrews ta bisa.
Por medio di e Erasmus programa, studiantenan cu tin un interes un tiki diferente of kier extende nan interes den departamento di accounting, finance of marketing, ultimo cuater aña nan tabata tin oportunidad pa bishita universidadnan partner y tuma les por ehempel cu Universidad di Aruba no ta ofrece.