Siman pasa a drenta informe na e redaccion di MasNoticia.com cu un docente di EPB lo a agredi un persona na su cas y cu consecuencia di esaki lo a wordo deteni. Ta trata di e incidente cu a sosode riba diabierna 30 di mei ultimo na un cas na Chuchubistraat unda segun e prome informe tawata indica cu lo tin maltrato entre pareja. Segun e informe cu nos redaccion a ricibi recientemente, e caso aki no tawata un caso di maltrato entre pareja si no maltrato entre dos ruman.
Diabierna mainta, 30 di mei 2020 a drenta varios melding pa un caso di maltrato na un cas na Chuchubistraat. Na momento cu prensa, cuerpo policial y ambulance a presenta na e sitio, por a nota cu e entrada di e propiedad a wordo distrui y cu tawata tin glas riba e vloer di e entrada. E situacion na e cas ainda tawata hopi tenso na momento cu prensa a yega unda hasta algun miembro di prensa a wordo menasa di wordo tira cu baranca.
Segun nos informe, e agresor a resulta di ta un docente di EPB Hato cu e ta ruman di e donjo di e cas na Chuchubistraat. E docente, cu ta biba algun cas leu por a scucha hopi gritamento y a dicidi di bay na dicho adres pa intermedia. E situacion na e cas a escala y bay for di man completamente na momento cu e docente aki a gara e doño di e cas choca, dal e contra e entrada di cas kibrando e glas di e entrada. Segun nos redaccion por a compronde, tawata tin un problema entre e famia cu ta biba na e cas cu a escala e mainta ey. Na momento cu e docente a yega e cas e la bay papia cu e pareha y yiu di e doño di cas pero na momento cu e la wak e doño di e cas, e la cuminsa grita e doño di cas, drenta e tereno di cas y agredi e doño di cas. Despues cu cuerpo policial a papia cu tur persona envolvi, a bai over na detene e agresor di inicialnan S.D.C.
Reaccion EPB
Dialuna mainta, redaccion di Masnoticia.com a tuma contacto cu Stichting EPB pa asina ricibi un reaccion tocante e caso. Segun nos redaccion por a compronde, directiva di e scol no tawata na altura di e caso aki pero cu lo inicia e investigacion nan necesario pa por dicidi ki medida disciplinario lo mester bay tuma pa dicho docente.