E situacion na Pius X School, ta uno cu e docentenan a bisa ta basta. Ya nan no por mas. Henry Barrera, docente di 6B, a splica cu awe dialuna mainta, e docentenan a reuni tempran pa papia riba e situacion ora cu nan ta dunando les. A dicidi cu nan no ta drenta klas pa motibo cu e bentananan no ta habri. E situacion riba su mes ta malo. Barrera a informa e directora Sheila Tromp cu nan no ta drenta klas, pasobra nan no kier traha bao di e situacion eynan mas. E ta insoportablemente calor entre 11’or y 1’or. E muchanan ta bira malo den klas, sodamento, tin coleganan cu a bira malo.
E bentananan no ta habri mes. Nan no ta sirbi mas. Tin cu kita bentana, pone bentana. Tabata tin dia cu mester kita full un bentana pa tin circulacion di aire. E directora a informa directora di Skoa, Josette Daal, cu e docentenan a pone trabao practicamente abao awor aki. Si tin cu bisa cu nan a cumpli henter aña cu e lesnan y cu e muchanan manera mester ta. Pero cu e situacion aki nan no tabata por mas.
Imagina e temporada di September pa November, cu ta super calor na Aruba. Ora cu drenta April pa Juni, final di Juni, no por duna les den e situacion eynan. Den e localnan, ta bira entre 37 pa 41 grado.
E docente a splica pa bin sinta den e klas pa un paar di siman, e ora ta ripara con drastico e situacion ta. Antes e muchanan na scol ta sinta henter dia te 3’or den calor, ta facil pa bisa. Antes ta 10 mil auto na Aruba. Awor aki tin casi 80 mil auto. Ora cu auto pasa, ta e zonido, e calor di motor, tur esey ta haci un efecto den e klasnan tambe y hopi hende no ta realisa.
E coleganan di 1ste pa 4de klas, ta staciona nan auto parti patras, caminda cu hende ta bay na e instancia. Ta un desordo, palabra malo, etc.
Den e skinanan banda di scol, parti pariba, ta drag tin cu brommer. Ta un situacion malo.
E docentenan a organisa rifa, etc. cu ta haci cu nan ta mantene e scol. Ta e bentananan a wordo instala, pero nan ta bon pa otro scol, depende e ubicacion di e scol. Pa e scol aki, e bentananan aki no a adecuado. No ta bay culpa ningun hende riba e bentananan. E edificio di e scol, no ta adecuado pa e bentananan cu nan a instala previamente.
Prome cos a pidi e cabesante di scol pa informa SKOA kico ta nan punto di salida y pakico nan a pone trabao abao. E docentenan ta contento cu nan ta haya e oido di sra. Daal. Sra. Daal na su turno ta sigur cu a yega di sinta varios biaha cu e minister di enseñansa of cu e comisionnan. DOW tabata siman pasa hunto cu e directora. No sa ki conseho nan lo tin pa e minister. Pero Barera ta kere cu e ministernan aki tin cu bay sinta na mesa. Awor tin un situacion pio. E minister aki ta bay baha, lo bay bin eleccion y si bin cambio of no, con ta para cu e scol. Barrera ta kere cu ta simpel.
Gobierno tin cu sinta cu otro, tin minister Benny Sevinger y Mike de Meza y esun di enseñansa. Nan tres mester bin hunto y sigur lo bin un solucion pa e scol, el a finalisa.