DNM ta pidi cooperacion di comunidad pa conhuntamente monitoria y proteha e Shoconan

Ta 1 aña pasa cu Directie Natuur en Milieu (DNM) a haci un yamada na publico pa yuda cu registracion di nos Shoconan. E cooperacion tabata positivo di cual a logra haya 60 registracion y asina DNM por a localisa mayoria neishi pa nan haya mas proteccion.

Despues di nos yamada publico, DNM a tag mayoria di e neishinan y asina a bira posibel cu nos por a monitorea sporadicamente e neishinan cu a localisa. Den transcurso di aña por bisa cu a constata parehanan cu yiu.
Di e meldingnan di cual e neishi tawata na peliger a atende cu tur. DNM na varios ocasion mester a duna conseho na habitantenan cercano, cu tawata disponibel pa yuda y coopera cu nan tereno, pa pone seronan di santo pa e Shoco tin mas opcion unda e por traha hol.
DNM ta compronde cu hopi hende ta prefera rosa tereno ora di traha cas pero mester tene cuenta cu e Shoco y nan neishi cu ta proteha pa ley. Pa ley ta prohibi pa destrui un neishi di Shoco y si constata cu a comete e acto di vandalismo, esun cu a haci’e tin cu para responsabel pa su actonan y carga cu consecuencia.

DNM y otro instancianan a pone aviso na algun localidad pa asina hende ta consciente di nan actonan den e area y pa eherce cautela. Pues tene cuenta cu por tin neishi den e areanan aki. Tambe den areanan di construccion prome cu coi santo, cana rond di e serito di santo pa wak si tin hol di Shoco.
DNM ta para firme tras di e proteccion di Shoco y por haci esey solamente cu sosten di e comunidad henter. Por sigui meld neishi di Shoco via telefon 584-1199 puntra pa Yesenia (Yessy) Farro Arends of Yahaira Jansen Geerman. Tambe por meld esaki via e plataforma Infraruba.com riba e tab medio ambiente/naturalesa y yena e formulario.
Foto: DNM

Comments

comments