Divi & Tamarijn All Inclusive Resorts a wordo empareja cu Pius X Basisschool pa medio di e plataforma di Kids Council, inicia pa Prinses hulandes, Prines Laurentien. Den e proyecto aki muchanan local di 6de Klas ta haya e oportunidad di investiga, y yega na solucionan pa dilemanan den comercio, den e caso aki den ramo turistico.
E iniciativa, awor den su di cuater aña, a resulta den collaboracionan pafor di e Kids Council tambe, y Divi & Tamarijn All Inclusive Resorts merece reconocemento pa nan contribucionan continuo pa cu e comunidad di Aruba.
Recientemente riba un Diamars mainda, e alumnonan di Basis School Pius X na Dakota tawata wardando den cura di scol, riba asphalt nobo, para netjes den un circulo wardando nan Hoofd di scol guia nan den nan oracion di mainta, sigui pa un anuncio special.
E Airconan nobo-nobo, cu a caba di wordo dona lo wordo sendi pa prome biaha e dia ey.
Divi & Tamarijn All-Inclusive a facilita e instalacion di 12 airco den e lokaalnan, caminda anteriormente tawata educa nos muchanan bou di daknan di zink sin plafond.
E proceso tawata largo, cuminsando na Maart, ora un electricien mester a mehorando e sistema electrico completo. E trabou aki mester a pasa inspeccion di ELMAR, pa despues na su momento Crown por a instala e unidadnan di airco.
Divi su Managing Director, Alex Nieuwmeyer, a primi e boton, y manera magia, aire fresco e cuminsa supla den e espacionan.
E scol aki, ta forma parti di e scolnan di SKOA, Stichting Katholiek Onderwijs, un fundacion cu ta dirigi 15 kleuter, 25 basisschool. 5 scol secundario y 1 scol pa muchanan cu necesidad special. 18 di e institucionan di e fundacion aki ta riba lista ainda pa instalacion di airco.
Director di SKOA, Anuesca Baly tawata presente pa expresa su gratitud na Divi pa e donacion fantastico aki, net na ora pa e aña escolar nobo.
E muchanan tawata para pafo den nan circulo, tur nechi peña y bisti cu nan polo-shit geel di uniform. Mientras cu nan Hoofd a guia nan den oracion nan a hasi nomber di Tata juiciosamente y a canta e himno di scol, yen di gratitud y alabansa.
Cada dia, cu cuminsa cu oracion y canto ta un bon dia, e Hoofd a conta nan.
E tawata un momento conmovedor, ora cu e Hoofd di Pius X a guia 200 stem angelical den canta: “Danki Divi pa e Airco”.