E fechanan di 5,6,7, di October 2018 ta promote di bira algo masha grandi den e cayanan di San Nicolas. Un deroche di arte, canto, baile, musica, lugarnan di strategico pa pasa filmnan historico di Aruba y tambe lugarnan specialmente hinca den otro pa trece tur loke ta musica di antaño y su storia pa e deleite di un y tur.
Aruba Art Fair ta evoluciona y ta creando espacio pa mas eventonan cu ta trese loke tabata, loke ta awe y kiko por ta mayan den forma di musica y arte.
Ya pa tres aña consecutivo Divi Resorts Aruba bao di guia di sr. Alex Nieuwmeyer ta forma parti como e cas di Aruba Art Fair. Artistanan Internacional di tur parti di mundo ta hospeda y disfruta di un di e mihor beachnan di Aruba combina cu e placentero intercambio di nos hendenan na momento cu nan ta representa lo mihor cu Aruba tin, cual ta su servicio amable y profesional.
Alex Nieuwmeyer, un artista cu curazon pa tur loke ta arte, no solamente ta perfila esaki den e diferente hotelnan aki na Aruba, pero ta cruza barrera pa duna e turista y local un poco mas di e excelencia di servicio cu Divi ta conoci pe, na momento cu e ta crea un pop up restaurant den un cas abandona den e caya principal di San Nicolas y converti esaki den un obra di arte.
Un experiencia unico, algo cu semper e tabata tin como vision y deseo pa crea. Lo inusual transforma den un lugar special rondona di arte y cultura. Un menu special na unda e bishitante di Aruba Art Fair por hasi su reservacion adelanta y ricibi un experiencia sensacional. Divi Resorts Aruba a sa di braza e formacion di Arte cu ta bolbe cada anja durante Aruba Art Fair y e aña aki lo cambia dos parti den e Resort y converti esaki den arte dinamico cu muralnan den 3D.
Divi Resorts Aruba no solamente ta e cas pa e Artistanan. Entre otro Leon Keer, Bordalo II y un elenco nobo for di Portugal pero tambe lo ta e cas pa e grupo di 7 curator Internacional cu lo ta presente prome y durante e feria, exponiendo nan obranan y tambe asesorando artistanan local cu charla y guia y asina cuminsa interveni pa engrandece e participacion Internacional aun mas pa 2019 y inicia e posibilidad di exporta e conocimento y participacion di nos propio artistanan Internacionalmente..
Nombernan manera Carmela Fenice, Victor Fuenmayor di Chile, Adreina Fuente di Miami y Minerva Lauffeur di Curacao ta djies un par di e ilustre elenco cu lo ta perfila nan conocimento durante Aruba Art Fair 2018.
Pa loke ta e muralnan, diferente artista lo bolbe Aruba pa retoca e murayanan y crea mas arte. No ta un secreto cu e muralnan ta atrae turista durante henter aña y ta e mantencion y diversificacion pa traha e ruta ideal pa tour e turistanan aki lo ta e prioridad pa 2018.
Y e simple hecho cu e bishitante por presencia e arte di Aruba, durante e tres dianan di Aruba Art Fair, mientras cu nan ta disfruta den un pop up restaurant cu un menu diferente y yamativo, tresi pa Divi Divi Resorts, ya caba ta un toke diferente di e adelanto inmenso cu e feria ta trece cune e anja aki. E aña aki e enfoque tambe lo ta riba instalacionnan grandi traha pa artistanan cu despues lo keda atras pa engrandece e cayanan di San Nicolas cu aña tras anja ta birando e centro di Arte di Aruba.
Aruba Art Fair 2018, ta posible atravez di Partnership cu entre otro, Aruba Tourism Authority Sui Generis, Prins Bernard Fonds Caribe, Unoca, Divi Resorts Aruba, Kooyman BV, AIS, Aruba Hyatt Resorts & Casino, VNO. Pa mas info bishita www.arubaartfair.com of mail [email protected].
Aruba Art Fair 2018 lo tuma lugar den e cayanan di San Nicolas, October 5,6,7, 2018. Carchinan lo ta na venta na tur Citgo, Plaza Bookstore, Superfood y na oficina di Aruba Art Fair na San Nicolas. No perde!