KRALENDIJK, Boneiro – E chikito pero hopi popular Divi Divi Air no ta bay warda hopi pa e asina yama “Twin Otters”. Esaki en todo caso ta segun informacion riba e website Ch-aviation, cu a sa di meld cu e compania di aviacion, cu su base na Corsou, lo a adkiri dos De Haviland DHC-6-300.
E dos avionnan ta procedente di Canada, caminda cu pronto nan lo ta bulando e ruta cu tabata wordo bula antes pa companianan local. Segun Ch-Aviation, e dos avionnan aki Twin Otters na Canada, a bula respectivamente pa Air Inuit y Air Labrador.
E website tambe a sa di informa cu Divi Divi Air, banda di e dos avionnan aki, lo a adkiri mas of menos un seis motor, dos motor Pratt & Whitney PW121 y 4 motor TPE331.
E paso pa avionnan mas grandi, esta Twin Otter (19 stoel), ta un muestra di ampliacion di capacidad contrario na e avionnan cu ta di e tipo Islander cu Divi Divi ta bulando cun’e actualmente. Aunke cu e avionnan islander oficialmente ta brinda espacio na 9 pasahero, no ta boek mas cu 8 pasahero pa vuelo, pa asina tin suficiente espacio pa ekipahe.
Divi Divi Air a wordo funda na 2001 door di Hans Barth, procedente for di Alemania. E compania, cu a cuminsa bula na comienso cu algun Cessna cu 7 stoel, a sa di gana coniansa rapidamente di cliente cu su vuelonan precies na ora. Algo cu e tempo ey ALM no tabata cumpli cun’e.
Una bes cu e avionnan Twin Otter wordo poni riba e ruta entre Boneiro y Corsou, lo por papia cu pa prome biaha den hopi tempo lo tin un concurencia pa Insel Air, cu mester a corta cu algun vuelo y stoel, debi na su problemanan financiero.
Vuelonan cu Divi Divi por wordo reserva via oficinanan di e compania na Boneiro y Corsou of online, via nan website www.flydivi.com.
Fuente: http://www.bonaire.nu