ORLANDO, Florida – Despues di un luna y mey cu e Gobierno di Trump dicidi si e ta extende of no e beneficionan migratorio di 50 mil refugiado procedentenan di Haiti, e alarmanan ta bati cerca tur doño di trabao.
E prome damnificado pa e no extende e Status di Proteccion Tempral (TPS) pa refugiadonan di Haiti, lo ta e gigante di e parkenan tematico na Florida. Disney ta conta cu mas di 500 trahado, entre otro mesero, bendedo, actor y personal di matenimento proveniente di e pais aki.
Pa e rason aki, e sindicato di Disney ta sigui pidi cu vehemencia pa e CEO Bog Iger, consehero di Trump den asuntonan comercial, intercede pa nan pa nan extende nan permiso di biba y traha legalmente na Merca.
E grupo di trahadonan di Disney ta forma parti di e 50 mil refugiadonan di e isla cu a yega Merca despues di e brutal teremoto cu a asota e pais na 2010.
E tempo ey presidente Barack Obama a concede e nacionalnan Haitiano e status di proteccion temporal (TPS). E beneficio aki a wordo amplia den varios ocasion debi na catastrofenan cu a ripiti manera brotenan di colega y dañonan causa pa e horcan Matthew na 2016.
Sin embargo e estado di proteccion di e refugiadonan aki ta programa pa vence na Juli. Den un carta filtra na medionan di comunicacion a divulga e intencion di e presidente Donald Trump di no extende e beneficio migratorio, loke ta nifica e deportacion di e 50 mil refugiadonan di Haiti.
E miedo a crece ainda mas e siman aki ora cu e Gobierno Trump a duna di conoce cu ta den e tarea di recompila e mayor cantidad di crimennan cometi pa dicho grupo di refugiado cu e fin di hustifica e no extension di beneficionan migratorio.
E investigacionnan riba e antecedentenan penal di e comunidad Haitiano a keda divulga despues cu algun email interno di e Servicio di Ciudadania y Imigracion di Merca (USCIS) conoci pa The Associated Press.
Den esaki a pone riba descubierto e intencion di conoce cuanto di e aproximadamente 50 mil inscritonan Haitiano den e programa di Status di Proteccion Temporal a tuma bentaha di beneficionan publico, como tambe e cantidad di crimennan cu nan a yega di comete.
Fuente: La Opinion