Diadomingo a tuma luga na Hulanda e edicion virtual di e celebracion di Arubadag. Manera conoci, e aña aki e celebracion importante aki pa nos Arubanonan na Hulanda no por a bay manera costumber pero si a wordo celebra na un manera virtual treciendo asina e ambiente di Aruba na hogarnan di nos hendenan na Hulanda. Prome Minister Evelyn Wever-Croes, manera tur aña, a duna su discurso virtual hopi bunita na unda su enfasis tawata pa nos hendenan na Hulanda pa semper corda cu nan ta nos embahadonan na Holanda y sigui carga e bandera Arubano cu orguyo.
“Awe nos ta conmemora un dia hopi especial. 45 aña di nos Himno y Bandera, den e aña cu nos ta conmemora 35 aña di nos Status Aparte. Awe mundo henter ta combatiendo un pandemia, e peor crisis cu nos paisnan a atravesa. Aruba a wordo afecta hopi fuerte pa Covid. Pero nos ta combatiendo e pandemia aki cu hopi forsa tambe, y nos a cuminsa lanta cabes caba.
Y awe mas cu nunca, nos mester di inspiracion y guia, pa den e momentonan dificil, nos no cansa ni entrega. Esaki ta conta pa esnan cu ta biba na Aruba y tambe pa tur nos Arubanonan cu ta biba na Hulanda. Laga nos wordo guia pa nos amor pa Aruba pa sigui lucha den e pandemia aki.
E aña aki, nos a mira atencion especial wordo duna na e dia nacional na Aruba. Tur scol basico a ricibi un bunita buki “Mucha crioyo mi ta”, cu ta conta e historia di Aruba.
E aña aki tabata tin tambe un bunita reconocemento na baluartenan di nos Himno y Bandera.
Nos a renoba e mast di bandera na Plaza Betico, riba un base den forma di strea cora di 4 punta, mescos cu nos bandera. Despues di 45 aña, nos bandera a haya su mast special riba e base special, pa nos futuro generacionnan por goza di dje.
Apesar di e pandemia, nos a celebra e fecha historico aki den un ambiente cordial, cu un trankilidad y cu felicidad. Ohala cu awe nos por reparti e sentimento ey cu boso cu ta biba na Hulanda tambe. Y pa esaki mi ta gradici nos GevMin Guilfred Besaril y su ekipo di Arubahuis, pa e trabou incansable di tur dia pa representa Aruba na Hulanda, y pa haci e celebracion di awe posible.
E aña aki tambe mi a bishita algun scol basico, pa mira con nan ta preparando pa nos dia di Himno y Bandera. Na un scol basico mi a puntra nan kico bo ta sinti ora bo ta den exterior, y bo ta mira e bandera di Aruba wordo hisa. Y nan a contesta “nos ta sinti hopi orguyoso”, “nos ta sinti nos curason ta yena di alegria”, “nos ta haya kippevel”. Boso cu ta biba na Hulanda sa esaki mas cu tur hende. Wel, si ta esaki bo ta sinti ora bo mira e bandera di Aruba wordo hisa, e ora bo sa cu bo ta stima Aruba.
Y aki mi kier yega. E legado mas bunita di nos generacion ta pa inculca e sentimento aki den tur nos muchanan. Pasobra e ora nos sa cu nan realmente ta stima Aruba. Y pasobra e ora, den momentonan dificil, nos por ta sigur cu nan ta wordo guia pa nan amor pa Aruba. Si bo ta wordo guia pa bo amor pa Aruba, e ora nunca bo ta comete eror.
Nos deber ta pa nos muchanan conoce nos historia, nos lucha, nos pais, di tal forma cu cada biaha cu nan wak nos bandera wordo hisa, e ta yena nan cu orguyo, cu emocion.
PASOBRA ESEY TA NAN IDENTIDAD.
Y pasobra nan sa kico kiermen stima Aruba. Y si bo ta stima Aruba, bo ta cuida nos naturalesa, bo ta cuida nos grandinan y esnan mas vulnerable, bo ta actua cu integridad.
Y talves bo ta pensa, “pero nos cu ta biba na Hulanda tambe”? E contesta ta SI.
Abo cu ta biba na Hulanda, sea temporal pa estudio of trabou, of bo a haci di Hulanda bo cas, boso ta nos embahadonan. Boso ta embahado di Aruba, unda cu boso bay. Kiermen, unda cu bo ta, sin cu bo ta consciente, bo ta cargando e bandera di Aruba. Representa nos bon semper y haci Aruba orguyoso.
Nos ta hunto den e pandemia aki, leu di otro, den incertidumbre. Pero laga e amor y stimacion pa nos Aruba guia nos. Ta nos amor pa nos dushi Aruba tabata e forsa di Arubanonan pa sali padilanti. E retonan cu nos ta pasando aden a consecuencia di e pandemia, tambe nos lo surpasa guia pa e amor y stimacion cu nos tin pa nos dushi Aruba.
Y apesar cu lo tarda te 2023 pa Aruba recupera completamente di e efectonan di Covid, di awor en adelante, nos lo mira avansenan importante di recuperacion na Aruba. Turismo. Economia. Inversion. Refineria. LNG. tin perspectiva prometedor pa Aruba. Nos tin hopi motibo pa ta positivo. Y ohala e ora nos por ricibi boso bek, sea pa bishita of pa biba, y pa bo yuda nos reconstrui nos pais, nos Aruba dushi tera, cu nos amor p’e ta asina grandi, cu no tin nada pa kibre”.
