Aki ta sigui e discurso di Procurador General na ocasion di e apertura oficial di e edificio nobo di Ministerio Publico situa den Rumbastraat.
“Awe ta un dia memorable. Awe nos edificio nobo lo wordo habri pa minister di Husticia Dowers. Y awe e Veiligheidshuis di Aruba tambe lo wordo habri. Esakinan ta dos sucedido hopi special, cu un Procurador-General normalmente ta experiencia un biaha so den su carera.
Mi ta cuminsa cu nos edificio nobo y bunita.
Minister di Husticia y ami a wak e ultimo añanan varios edificio pa mira si nan ta pas y ta alcansabel como luga nobo pa Ministerio Publico di Aruba. Finalmente a scoge pa e edificio nobo bunita aki, cu ta na un sitio bon accesibel. Pesey cu un gradicimento den direccion di e minister di Husticia ta mas cu na su lugar.
E edificio aki ta pas cu Ministerio Publico. E ta radia prestigio y autoridad. Den e edificio nobo aki, mescos cu den esun na Havenstraat, tanto e Parket di Procureur-Generaal, como e Parket di Hoofdofficier van Justitie ta hunto. Ambos parket ta traha diariamente hunto na un manera hopi intensivo pa combati criminalidad.
Un edificio nobo ta significa tambe un comienso nobo; un comienso nobo den combatimento di criminalidad na Aruba. Varios paso a wordo tuma pa cu e meta ey, conhuntamente cu e partnernan den e cadena hudicial, manera Polis, Aduana, Belastingdienst, Kustwacht y Koninklijke Marechaussee.
Mi ta para keto un rato na e desaroyonan di e ultimo aña aki.
Nos a traha duro den Integraal Afpakteam di Aruba, hunto cu e otro partnernan, pa kita capital criminal. Ademas nos a traha na un forma integral pa bringa mensenhandel y mensensmokkel. Esaki por unicamente si nos comparti informacion cu otro, manera nos ta bin ta haciendo den Fusion Center di Aruba. E Fusion Center ta un punto central, unda ta comparti informacion cu nos partnernan den e cadena hudicial, cu como meta pa bringa criminalidad den un forma basa riba informacion.
Alabes nos a sigui profesionalida e organisacion interno di Ministerio Publico, door di traha mas dirigi pafo. Kiermen, mas dirigi riba e ambiente externo. Den practica, e ta nifica mas contacto intensivo cu prensa, pa asina nos como Ministerio Publico por splica pueblo di Aruba y na nos partnernan den cadena hudicial, kico nos ta haci y dicon y tambe kico nos ta para pe.
Pues e ultimo aña hopi desaroyo a start sali. Nos lo sigui cu esaki, pasobra nos no ta cla ainda. Mi kier gradici mi trahadonan di curason pa nan flexibilidad y compromiso na e cambionan, cu a wordo incorpora caba y cu ta na caminda.
Pa futuro nos tin como meta pa bringa criminalidad comun na un forma dinamico, rapido y eficiente. E manera di traha aki nos ta yama e maneho ZSM, den cual Polis, Ministerio Publico y e partnernan den cadena hudicial ta bringa crimennan comun na un manera dinamico. Den ZSM ta dicidi mas lihe posible, despues di detencion di un sospechoso, con ta bay sigui cu su tramitacion (afdoeningstraject).Ta trata aki di intervencionnan significativo, den cual sospechosonan ta haya un reaccion cu ta pas cu loke nan a haci, y den cual victimanan ta mira nan derecho, y den cual e vecindario ta ripara con lihe un sospechoso ta wordo coregi. Tur esaki den un cadena hudicial, den cual e partnernan hunto ta forma un solo cadena y por actua rapidamente.
ZSM kier meen na Hulandes: Zo Snel, Slim, Selectief, Simpel, Samen en Samenlevingsgericht Mogelijk.
Pa traha na un manera significativo ZSM ta haci uso di diferente forma pa tramita un sospechoso, tambe pafo di Ley Penal. Hunto. Den ZSM, Ministerio Publico, Polis y e partnernan den e cadena hudicial ta para literalmente schouder cu schouder.
Banda di e tarea represivo di Ministerio Publico, ta nos ambicion tambe pa tuma medidanan preventivo pa evita cu hobennen en especial, subi mal caminda. Nos como instancianan di gobierno y organisacionnan social mester percura pa traha mas hunto y pa inverti den nos hubentud den e lucha contra criminalidad. Esun cu ta doño di hubentud, tin e futuro den su man. Esey ta un responsabilidad y na mes momento un opdracht pa henter sociedad y no solamente pa ministerio di Husticia, Ministerio Publico y Polis. Tambe e ministerionan di Enseñansa, Asuntonan Social y Salubridad Publico ta necesario pa duna hoben y adultonan hoben perspectiva riba un bida yena cu sentido.
Mi a yega na e di dos motibo di fiesta awe, loke ta e apertura di e Veiligheidshuis of Plataforma di Siguridad di Aruba. Mi ta hopi gradicido na e fondo di FDA cu a pone un suma di placa disponibel pa realisa esaki.
Kico ta un Veiligheidshuis? E Veiligheidshuis ta un concepto cu a bin for di Hulanda y ta un relacion di cooperacion entre partnernan den e cadena hudicial y e cadena di cuido, manera FMAA, y otro partnernan, manera departamento di Enseñanza y FCCA pa loke ta vivienda. Tur e partnernan aki ta traha hunto na un acercamiento integral di insiguridad y ta dirigi nan mes riba criminalnan hoben, personanan cu ta bin hopi den contacto cu Husticia, ex-detenidonan y personanan cu ta causa molester.
E Veiligheidshuis ta na prome instancia un manera di traha. Un tipo di maneho. Pero e ta literalmente tambe un cas: tur trahado ta localisa den un solo edificio na Ministerio Publico. No solamente fiscal y Polis ta ocupa nan mes cu un sospechoso hoben, sino tambe Jeugdzorg, Kinderbescherming y Reclassering.
Riba kico Veiligheidshuis ta traha? E Veiligheidshuis ta traha vooral riba preveni recidive y exclusion social. Esey ta conta pa hende cu a kibra Ley, por ehempel di violencia domestico, pero e ta conta tambe pa individuonan of gruponan cu ta core riesgo. Veiligheidshuis tin como prioridad, hobennan cu ta na riesgo, personanan cu ta bin frecuentemente den contacto cu Husticia, hendenan cu problema mental y asistencia na ex-detenidonan.
Pa motibo cu nos tin hopi biaha di haber cu sospechosonan cu problemanan psikiatrico, mi ta contento cu un di e oradornan di awe ta dokter Van Gaalen, psikiatra. Dokter van Gaalen y dokter De Jong ta responsabel pa e binimento hunto den e area di cuido psikiatrico bao di e nomber nobo Fundacion Salud Mental Aruba (FSMA).
Ministerio Publico lo bay hunga un rol prominente como voorzitter den realisacion y completacion di e Veiligheidshuis of Plataforma di Seguridad. E nucleo di e Plataforma lo ta un trahado di Ministerio Publico, y pesey cu e lo ta localisa den nos edificio nobo. Pero mi ta enfatisa cu e Plataforma ta un responsabilidad di nos tur.
Mi ta conclui cu palabranan di gradicimento. Mi kier gradici abo, minister, cu a haci e edificio fantastico aki posibel. Mi ta dirigi mi na Jan Boogaard y Miguel Boogaard, cu kendenan nos a traha masha bon mes. Y finalmente mi ta gradici Renato Loefstop y Tica Boekhoudt y Jean-Pierre Winterdaal pa tur e trabao, tambe den fin di siman y anochi, cu boso a dedica na nos mudamento. Danki ademas na Ben King pa bo ideanan.
Mi ta spera cu deseo riba un bon cooperacion cu boso tur pa haci comunidad di Aruba mas sigur.“