Aki ta sigui e discurso di despedida di Su Excelencia Gobernador di Aruba, sr. Fredis Refunjol, cu a tuma luga den Parlamento di Aruba.
“Señora Presidente; Honorable miembronan di Parlamento!
Su Excelencia Ministro Presidente; miembronan di Conseho di Minister; señora Ella Tromp-Yarzagaray, nos Gobernador Interino saliente; señora Yvonne Lacle, nos Gobernador interino; demas distinguido dignatarionan; invitadonan; dama- y cabayeronan.
Señora Presidente, masha danki pa e oportunidad cu Bo ta otorga mi awe pa por dirigi mi mes na Parlamento di Aruba. No ta di prome biaha aki. Pero mi ta tribi di bisa cu tur seguridad, cu awe ta e ultimo biaha cu mi ta dirigi mi mes na boso, como Gobernador!
Dia prome di Januari 2017 mi sucesor ta asumi su cargo y dia 5 di januari e lo acepta su funcion den Parlamento di Aruba.
Practicamente diesdos aña y ocho luna pasa, pa ta exacto dia prome di mei 2004, mi a acepta mi funcion den nos Parlamento. Esey tabata cuminsamento di diesdos añanan bunita, pero tin biaha tambe añanan trabahoso como Gobernador. Mi tabatin e privilegio di por a traha cu diferente Gobierno y Parlamento, den diferente constelacion. Mi ta sinti mi honra y orguyoso di por a sirbi nos país Aruba. Di por a sirbi mi pais segun mi consenshi. Diesdos aña y pico den servicio di nos pais y di nos Reino.
Pero prome cu esey mi tabata tambe basta tempo activo den politica Arubano en total nueve ana. Como miembro di Parlamento y tambe diez ana como Minister. P’esey, Parlamento ta pa mi, un ambiente conoci y di confiansa.
Señora Presidente, awe mi ta sinti mi un tiki asina manera e “ultimo di e Mohicanonan”. Echo ta cu, for di formacion di nos pais na 1986 mi a attende 30 di 31 apertura oficial di ana parlementario y di cual 29 consecutivamente.
Mi tabatin e privilegio di mira nos democacia hoben desaroya y crece, y mi tabata tin e oportunidad pa por a duna un contribucion chikito. Mi ta agradecido y orguyoso cu mi por a haci esaki pa Aruba.
Mi no por a haci esaki sin apoyo di hendenan rond di mi, tampoco sin sosten di comunidad di Aruba den tur su diversidad, y tampoco sin apoyo y cooperacion denter di nos famia di Reino.
Y sigur cu lo mi no por a logra haci esaki sin e “role-modelnan”, kendenan a yuda forma mi den mi bida. Mi lo no por a haci esaki sin e “modelonan” manera mi tata y mi mama, mi famia, pero tambe e “voluntarionan” den deporte y enseñansa, unda mi pasion mas grandi tabata y ainda ta. Nan tur a forma mi y a contribui na tur e oportunidadnan cu ami – como un simpel mucha di bario – a haya. Masha masha danki!
Señora Presidente, lo no straña bo, cu ami como ex-docente y como ex-minister di Enseñansa, ta kere sagradamente den e oportunidadnan cu nos por crea pa nos pais cu bon educacion pa nos yiunan y nos nietonan. Den un mundo cu tur ora bay ta bira mas chikito, den un mundo den cua desaroyonan ta bay mas lihe y den cua fronteranan ta medio disparce, ta esencial cu nos ta prepara nos hobennan pa oportunidad- y posibilidadnan cu ta surgi.
Bon educacion, accesibel pa un y tur, ta percura pa prosperidad y un convivencia duradero y pacifico. Politicamente mira, enseñansa no ta un expediente facil. Fuera di cu enseñansa ta exigi inversion, hopi inversion, riba plaso largo. Enseñansa ta costa hopi placa, sin cu bo ta mira resultado den e proximo eleccion.
E scogencia pa inversion den enseñansa ta exigi un postura duradero riba termino largo, los di e realidad politico diario. Bon enseñansa ta exigi esfuerso grandi, vision y scogencianan bon pensa di Gobiernonan, pero enfaticamente tambe di Bo Parlamento, como e representacion mas halto di pueblo di Aruba.
Parlamento ta representacion real di nos pueblo. Boso tur, como Parlamentario, ta worde eligi. Pueblo di Aruba ta eligi boso pa sirbi e pueblo di Aruba den un forma integro y segun e forma cu miho boso por. Como ex-politico mi ta compronde hopi bon, cu politica ta cana tin biaha banda di liñanan di partido, cu tumamento di decision ta bay segun puntonan di bista stipula y scogencianan denter di un fraccion.
Aruba ta un comunidad chikito, den cua tur hende conoce tur hende. Den cua decisionnan trabahoso riba nivel politico, sea como Parlamentario of como Minister, por tin consecuencianan directo pa hendenan cu ta hopi cerca di nos. Tin biaha esaki ta haci dificil pa haci scogencianan y pa defende puntonan di bista.
Sinembargo, den nos democracia parlamentario, esey ta un parti fundamental di e papel cu boso tin cu eherece, como Parlamentario, como miembro di Gobierno, como miembro di institucionnan di nos pais, manera Controlaria General, Conseho Consultativo, Colegio Arubano di Supervicion Financiero, y pami tambe, como Gobernador. Decisionnan beneficio di Aruba y na interes di nos pueblo Arubano.
Señora Presidente, den otro discursonan mi a papia riba esaki caba, nos tur aki presente tin un tarea ehemplar pa nos pais. Esey ta nifica cu nos – den nos trabou cotidiano – mester actua como “role-modelnan”. Sin duna nos propio interesnan preferencia, riba e interes colectivo di e pueblo. Y esaki door di comportacion integro, pa anda cu otro cu respet. Pa supera cuestionnan individual y pa conduci discusionnan riba contenido y no riba e persona.
Como representantenan di pueblo eligi, ta boso tarea pa independientemente, a base di boso propio formacion di huicio y criterio y a base di boso consenshi, pa haci scogencianan. Tal manera nos Gobernador Interino a observa durante aceptacion di su funcion dia 7 di november ultimo, ta Constitucion di Aruba ta e guia principal.
Pueblo a eligi boso pa controla y pa sigui den forma critico, e maneho di Gobierno, y pa aproba of desaproba legislacion. Pa boso tarea boso a haya autorisacion y e medionan necesario. Uza nan bon y uza nan den forma corecto. Mi ta pensa por ehempel riba boso derecho di modificacion (enmienda) y riba boso derecho di iniciativa. Si boso, por ehempel, unanimamente, – y los for di boso color politico – acepta un mocion, anto ta boso tarea pa percura tambe, pa wordo ehecuta.
Señora Presidente, y m’a bisa esaki anteriormente. Parlamento ta pa mi un ambiente di confiansa. Un Parlamento y un democracia Parlamentario no ta algo cu ta surgi automaticamente. E echo di por eligi un Gobierno y e representantenan di pueblo den tur libertad, no ta algo cu ta bini “djis di mes”.
E derecho di voto, tanto pa eligi un Parlamento of pa worde eligi como miembro di Parlamento, ta ún di e derechonan fundamental cu nos tin na Aruba y den nos Reino. Esaki ta algo cu nos mester ta orguyoso di dje. Nos pais a crece den e ultimo trinta añanan, Aruba a desaroya su mes den e democracia mas hoben, cu ainda nos ta.
Mi ta mira hopi potencial den nos Parlamento y mi ta mira e oportunidadnan, e posibilidadnan, pa sigui crece mas ainda den nos democracia. Cu tur respet pa e diferente rol- y tareanan cu e institucionnan legislativo, hudicial y ehecutivo tin denter di nos pais y denter di nos Reino.
Señora Presidente, mi ta bay conclui. Pero mi no ta haci esey, prome cu mi expresa mi palabranan di gratitud un biaha mas.
Si Bo ta permiti, primeramente mi ta habla danki na mi famia.
Gustosamente mi kier gradici Su Mahestad Rey Willem Alexander y Prinsesa Beatrix pa e confiansa cu semper nan a deposita den mi.
Banda di esaki mi kier expresa mi gratitud pa e sosten y e relacion caluroso cu e diferente instancianan di Reino y Ministerionan semper a brinda ami y e pueblo di Aruba. Particularmente mi ta corda riba e bon relacion cu Ministerio di Defensa y Marinierskazerne.
Mi kier gradici e Gobierno di Aruba y e Gobiernonan anterior pa nan cooperacion, pa e apoyo y e amistad cu mi por a haya. Pa e espacio cu mi a haya pa por funciona den e función aki.
Mescos esaki ta conta tambe pa e diferente Colegionan halto di Estado, organonan di consulta, departamentonan di Gobierno, cu constantemente a haci mi trabou posibel, for di nan propio rol y tarea.
Mi kier gradici mi Gabinete cu, bon mira, tambe ta un parti di mi famia durante e ultimo diesdos añanan. Sin nan sosten, lo mi no por a ehecuta mi trabou di e forma aki.
Mi kier dirigi un palabra special di danki na e boluntarionan y na e organisacionnan boluntario, cu tur dia, aña ’den aña ’fo, ta haci trabou desinteresadamente pa esnan, kendenan realmente tin mas mester di yudansa. Semper boso por a conta cu mi apoyo, y boso por sigui conta cu mi sosten.
Señora Presidente, pa ultimo, pero podise como lo mas principal, mi kier gradici for di profundo di mi curason, Parlamento di Aruba, y asina tambe henter e pueblo Arubano. Sin e combersacionnan incontabel, sin e bishitanan legio y e cordial bonbini cu mi a ricibi durante diesdos aña y pico tur caminda na Aruba, lo mi no tabata capas pa sirbi Aruba como Gobernador.
Mi ta orguyoso y mi ta sinti mi honra cu e confiansa cu boso a deposita den mi.
Tur aki presente, danki! Mi ta sumamente honora y agradecido di por a topa cu bosonan frecuentemente durante ultimo 12 añanan!
Masha masha danki!”