IOWA, Merca- E desaparicion di un studiante universitario den e curason di Merca, tabata tin gran parti di e sociedad Mericano den suspenso pa un luna caba. Pero e noticia di cu’n inmigrante ilegal supuestamente lo a confesa cu el a secuestra y mata e hoben, a pone e tragedia aki den un polemico debate riba inmigracion faltando algun luna pa eleccionnan legislativo Mericano.
Presidente Mericano, Donald Trump a probecha e aresto di e homber pa e morto di Mollie Tibbetts diamars, pa califica e leynan di inmigracion den e pais como “un desgracia” cu solamente lo por wordo drecha si mas Republicano wordo eligi. E gobernador Republicano di Iowa, cu ta bay pa su reeleccion, a ataca e sistema di inmigracion cu a “permiti un depredador manera esaki biba den nos comunidad”. Y e dos senadornan di Iowa a califica e morto di Tibbetts como un tragedia “cu por a wordo evita”.
Cristhian Bahena Rivera, di 24 aña, a wordo aresta y acusa di asesinato den prome grado pa e morto di Tibbetts di 20, cu a disparce dia 18 di juli ultimo y cu a desencadena den un buskeda masivo unda cu autoridadnan estatal y federal a participa.
Rivera a hiba investigadornan diamars te na un curpa cu nan ta pensa cu lo ta di Tibbetts den un campo di plantacion di maishi na 19 miya zuidoost di Brooklyn, Iowa, unda Tibbets a wordo mira pa ultimo biaha haciendo deporte.
Den cuestion di algun hora, Trump a toca e tema di e aresto den un congregacion na West- Virginia, algun hora despues di cu su ex abogado personal y ex presidente di su campaña a enfrenta problemanan legal grave cu por termina implicando Trump.
Hopi biaha Trump ta relaciona e crimen cu personanan cu ta biba ilegalmente den e pais. El a celebra tambe eventonan na White House cu miembronan di “famia di angelnan” cu nan familiar a wordo asesina pa inmigrantenan.
Aunke Trump ta afirma di cu e residentenan legal na Merca ta menos inclina na comete delito, varios ta e estudionan sociologico y e think tank libertario Cato Institute ta considera cu e afirmacion aki no ta berdad y cu estadonan cu un gran cantidad di persona cu ta biba den e pais di manera ilegal tin tasanan di delincuencia violento mas abao.