Den varios medionan di comunicacion nos por a tuma nota di un declaracion di minister Schwengle cu, aunke cu no ta su cartera, e lo bay haci investigacionnan di e awa y otro molester cu tin di haber cu nos medio ambiente, manera e dump di Parkietenbos. Schwengle ta lubida di menciona cu ta e su mesun Gobierno di AVP a percura pa boycott e proyecto di dump y ta cuasa di e molester pa e ultimo 8 añanan? Unda e minister aki tabata dia cu a acorda e contracto strangulante cu Citgo, cu ta contene un paragrafo basta largo na unda ta EXONERA Citgo di tur cu loke ta trata medio ambiente? Esaki ta conta pa loke ta trata leynan local cu lo por bin den futuro, pero mas pio ainda, cu lo no por impone ningun regla cu ta existi riba nivel internacional.
Ta mas cu obvio cu e minister aki un biaha mas ta actuando pa scapa peyeho di e fracasonan di e Gobierno aki y muy en particular esun di Mike Eman. Prensa Mericano y prensa internacional a anuncia cu e Gobierno Mericano lo bay impone medidanan hopi pisa riba Venezuela. E compania Citgo lo ta un di nan cu lo bay wordo afecta door di e medidanan aki. Kico lo bay ta e consecuencia pa e “upgrader” na Aruba maneha pa Citgo-Aruba? Si encaso e deal no bay door, anto e partidonan cu a bay ciegamente tras di e contracto strangulante aki, esta AVP, MEP y POR lo mester bay splica pueblo na placa chikito di con a firma sin tin un bista total kico e deal ta encera. Parce cu ya caba Mike Eman a cuminsa busca tur forma di haci “damage control” y nos ta convenci cu e anuncio heroico di e gigante Schwengle ta forma parti di e “damage control” aki.
Alabes e pregunta ta surgi con bin cu ta te awor tin interogante riba Arugas y Ecogas? Ta asina kier purba di yuda Mike Eman pa haci un damage control pa e contract cu Ecogas, cu a costa mas di 40 miyon florin di WEB? Enbes di a sinta na un manera serio y busca un solucion pa e problema cu tin eynan, ta busca tur manera pa scapa e peyeho di Mike Eman pa e hecho cu e proyecto te ainda no a duna e resultado cu a ser spera, apesar di e tantisimo placa cu a wordo inverti door di entre otro WEB. E mesun modus operandi a sosode den tempo di Racetrack na unda Henny Eman a uza Tico Croes pa bin cu condicionnan adicional, cu al final pueblo di Aruba a “end up” ta paga mas di 30 miyon dolar, sin tin dicho proyecto.
Aki ta mustra mesun cos. Enbes di sinta na mesa cu e inversionista local aki pa mira con y kico mester haci pa evita cu tin un “kapitaalsvernietiging” pa ambos partido, esta tanto pa pueblo, como Ecogas, Mike Eman ta usa su mucha manda Alex Schwengle pa haci e trabou sushi. UPP ta kere cu, apesar cu e procedura usa a bay contra tur regla di Good Governance, mester busca tur manera pa yega na un solucion na bienestar di nos tur. Y solucionando e problema aki, cu tur transparencia, Serlimar como patrimonio di pueblo, lo wordo scapa tambe di un desangramento.
E vision di Mike Eman pa Aruba lo ta 100% green na 2020 ta parce di lo bira un fracaso total. Hasta Corsou a laga nos atras den introduccion di energia renobabel. Corsou a bin ta haci esaki keto y sin mucho buya. E fracaso aki no lo tin unicamente consecuencia serio pa nos situacion economico y financiero cu e aumento di e debe nacional, pero lo resulta den un deterioro pio di nos enseñansa, nos siguridad social cu lo ocasiona un aumento drastico di nos criminalidad. Mientras cu internacionalmente nos lo perde credibilidad.
P’esey pueblo di Aruba tin un alternativa viabel y realistico den e combinacion PPA/UPP, cu ta ofrece un plan (Plan 3Mil +) pa libra e pueblo for di e dilemma cu pueblo tin, esta e hecho cu nan ta wordo yena cu promesanan falso y fofo di partidonan cu hopi placa y cu tin doño.
E plan aki lo hiba e pueblo na e siguiente nivel door di percura pa nos por sigura e pueblo cu ideanan cu a hiba hopi otro paisnan den un desaroyo positivo. Na prome luga introduccion di reglanan di Good Governance sigui pa e “Mededingingsautoriteit” y e “Swiss-Model lo percura pa crea confiansa den e pueblo y e inversonista. Pareu cu esaki inversion di nos enseñansa unda ta hisa e nivel di educacion di nos comunidad. Esakinan ta condicionnan cu lo mester percura pa un crecemento economico duradero y sostenibel y garantisa cu e pueblo di Aruba tin un MIHO MAÑAN.