Michelle de Groot kende awor ta e directora nobo, a splica mas di su reto cu el a tuma pa por traha pa desaroyonan di ATIA.
De Groot ta sumamente contento y orguyoso di e confiansa cu a wordo poni den su persona, pa guia ATIA den e operacionnan diario. E ta specialmente contento di por a drenta ATIA na e momentonan specifico aki, caminda cu ta traha riba un plan strategico riba termino largo, cu lo fungi riba guia principal pa e futuro rumbo cu ATIA lo tuma como organisacion mas grandi di dunadonan di trabao.
Den e plan strategico aki, cu lo wordo finalisa prome cu e aña aki caba pa implementa na 2017, lo defini con pa brinda maximo beneficio na su miembronan. Enfoke principal naturalmente ta pa sigui boga pa nan derechonan y pa un clima economico sano, den cual e miembronan por prospera.
Pa loke ta e plan strategico aki lo ricibi asistencia special di e organisacion globalmente reconoci ILO, cual ta International Labor Organisation y den futuro kier sigui colabora estrechamente cu organisacionnan den e caliber aki pa por haci uzo di nan servicionan, nan conocemento y nan asistencia.
Ta anuncia tambe e evento, e evento corporativo anual, cu lo tuma luga dia 2 di December, den e Grand Ballroom di Marriott Aruba Resort & Stellaris Casino, for di 7’or pa 12’or di anochi. Tur aña kier trece un topico al caso na e momento ey y e aña aki a dicidi pa bin cu e topico di e reapertura di e refineria, de Groot a splica.