WASHINGTON D.C. – Director di un organisacion sin fin di lucro Mericano a perde su trabao, despues cu el a yama Michelle Obama un “macaco riba hilchi”. Un alcalde tambe a haya su mes den problema, ora cu el a sostene e reaccion.
Pamela Ramsey Taylor a skirbi riba Facebook: “Con refrescante lo ta pa tin un bunita Prome Dama y cu yen di estilo den Cas Blanco. Mi ta cansa di mira un macaco riba hilchi.”
E post aki a percura pa hopi reaccion tanto local como internacionalmente. Tambe e coleganan di Taylor, cu ta na timon di e organisacion subsidia pa Gobierno, cu ta duna ayudo na hendenan grandi y pobernan, no por a aprecia e remarca aki en lo absoluto.
E dama a perde su trabao, segun medionan Mericano.
E alcalde di un pueblo den West Virginia tambe ta sinta riba batata cayente. El a reacciona riba e post: “Bo a caba di drecha mi dia.”
Duele
Taylor a kita e post y a purba drecha cuenta den un post largo, pero hopi facil e no a bay. Miseeharris.com a publica un screendump di su ultimo noticia di Facebook, caminda cu el a skirbi entre otro: “Ta duel mi cu mi a perhudica hende. Esey no tabata e intencion. Mi a referi den mi post riba mi interpretacion personal di atraccion, no riba color di cuero.”
Michelle Obama a haya hopi sosten riba medionan social. E Prome Dama ta enormemente popular na merca, entre otro pa su discursonan fuerte. Hopi Mericano ta desapunta riba e noticia cu segun Barack Obama, nunca e lo pone su mes eligibel pa presidente.
Fuente: De Telegraaf