Durante e di 32 di edicion di Aruba International Half Marathon, a invita un grupo di Suecia pa tambe forma di e evento. E grupo a consisti di Petra Månström y Lina Skandevall, ambos ta periodista y influencer, Shahrzad Kiavash un atleta cu desabilidad, Paula Boyer, representante di KLM y 7 agencia di biahe.
Cu esfuerzo di A.T.A. conhuntamente cu socionan KLM, Divi All Inclusive y Barceló Aruba a invita e grupo aki riba un biahe pa familiarisa y experiencia nos isla y alabes participa den e half marathon cu a tuma lugar diadomingo 26 di Maart. Petra Månström y Lina Skandevall, dos influencer procedente di Suecia, cu tin bon acogida bou di e publico como tambe miles di siguido riba rednan social, a wordo invita pa forma parti di e grupo aki. Durante nan bishita riba nos isla, nan tabata comparti nan experiencia cu nan siguidonan via Instagram y Facebook. Shahrzad Kiavash cu ta un atleta paralimpico cu a participa pa prome biaha aña pasa den weganan Olimpico na Brazil y ta preparando su mes pa e proximo weganan olimpico, tambe a wordo invita pa A.T.A. y socionan pa tuma parti na nos half marathon. Su persona a gusta e idea di por participa den e half marathon cu alabes a sirbi como parti di su practica pa e proximo olimpiada cu lo tuma luga na Tokyo, Hapon.
Shahrzah a forma parti di e ekipo “relay” durante e half maraton hunto cu Paula Boyer, representante di KLM na Suecia y Albertino “Betto” Maduro. Paula a core e prome etapa di Joe Laveist pa Seri di Teishi, sigui pa Betto, kende tin descapacidad di vision, pa e di dos etapa di Seri Teishi pa Juliana School. E ultimo etapa di Juliana School pa Alhambra Casino a ser termina pa Shahrzah. Remarkabel ta cu tanto Shahrzad y Betto ta atletanan cu limitacionnan fisico y nan participacion den e half maraton ta sirbi como fuente di inspiracion. Ambos a demostra cu nan limitacion no ta stroba nan pa logra nan metanan.
Directora di A.T.A., Ronella Tjin Asjoe- Croes, a topa hunto cu Shahrzad pa asina gradici’e pa su participacion den nos half marathon y tambe elabora riba su experiencia te awo riba nos isla y alabes papia di con su pasion pa triatlon a cuminsa. Shahrzad ta sumamente impresiona cu Aruba, su bunitesa y hende caluroso. Tambe el a comenta cu Aruba tin hopi pa ofrece riba e tereno di wellness y cu esaki sigur lo ta un tremendo “selling point” pa Aruba, specialmente pa bishitantenan cu ta bin nos isla pa un temporada largo. Shahrzad su trayecto ta uno impresionante y sigur inspirativo. Surpasando diferente obstaculo den bida, incluyendo saliendo for di su pais natal como un refugiado, a dune un forsa inmenso. Awendia e ta dedica su tempo tambe na duna lectura unda e ta inspira hoben y adulto.
A.T.A. kier gradici tur socio y alabes felicita IBiSA cu un exitoso half marathon unda tabata tin participadornan ambos di Aruba como internacional. Shahrzad y Betto ta demostra cu e Half Marathon ta accesibel pa un y tur. Aparte di esaki den e periodo di April 29 pa 5 di Mei A.T.A. hunto cu Tierra del Sol y Divi Links lo organisa e prome torneo amateur di golf pa un grupo di golfistanan Hulandes hunto cu algun di Aruba cu tin limitacion. Lo spera 20 golfista cu limitacion cu lo yega diasabra 29 di April cu un programa bon hinca den otro caminda aparte di hunga golf nan lo tin oportunidad pa conoce Aruba.