Despues cu den prensa a sali di un caso cu un docente a tenta un mucha pa “gay”, Director di DPS Whitney Kock a splica riba un keho cu e drenta na Servicio di Scolnan Publico.
DPS ta un departamento di scol publico y den e cuadro di esey no solamente e scol publico ta conoci cu ta tuma tur tipo di religion, tambe diferente rasa y hasta diferente orientacion sexual.
E ta un reto cada biaha pa e persona cu ta kies un scol publico pa motibo cu e tin un conviccion religioso y por ehempel no kier bay un scol catolico, y ta kies un scol publico, e persona aki, un otro persona por wordo confronta, cu un docente cu ta homosexual of alumno cu ta homosexual y e mesun derecho cu e tin, pa practica su fe libremente eynan, e mester wordo comprendi cu di otro banda, e otro persona tambe tin e mesun derecho pa e practica su bida sin tin cu tin miedo di diferente cos. Den cuadro aki, e caso specifico aki, DPS te ainda no a wordo poni na altura di dje. No sa nomber, no tin detaye. A tuma contacto cu e scol asina cu a wak riba noticia y e director adhunto a menciona cu esaki no ta na su scol. El a tende cu ta na un otro scol. Biniendo riba esey, diaranson despues di merdia, a haya un mayor cu a bin entrega un keho y en berdad e partinan di e noticia ya divulga, ta loke e mayor a trece dilanti. Segun maneho di DPS, ta trata di menornan di edad, ta trata di un empleado di DPS. A wordo poni na altura diaranson. A tuma e pasonan pa por continua cu e investigacion y cual ta andando. No ta haya cu e ta oportuno pa duna detaye di dje awor aki, pero siguramente una bes cu esaki sali afo, loke ta permisibel pa trece afo, lo wordo treci dilanti, segun Kock.
DPS ta tratando e caso aki cu tur cautela y privadidad.
Cualkier otro caso cu mayornan no ta sinti’e comodo cu algo pasa su luga, pa loke ta trata scolnan publico, e prome luga mester atende na e scol. Si e tin un diferencia di opinion y no por sali afo, por bay na e cabesante. Y si por bay mas leu, DPS su portanan ta habri pa atende casonan asina, cu ta wordo tuma semper na serio y cu tur cautela, ta traha cu e funcionarionan den staf. Ta scucha tur partido, caminda nan ta duna nan version, nan ta firma esaki di biaha y asina ta formula un conseho como dienst, kico lo mester wordo haci y esaki al final ta keda den man di minister, segun Kock.