Durante e prome reunion cu sr. Jacco Vroegop como director medico prome biaha hunto cu e dunador di trabao, sindicato, recurso humano, hurista di hospital, a laga sa hopi cos segun Gina Maduro di Sindicato ABV. Entre otro, e director a por ehempel cana rond den edificio y papia cu tur trahado pa conoce tur hende, pero el a bisa algo clave segun sra. Maduro.
El a constata cu tin hendenan di mas, “el a menciona esey, cu tin hendenan di mas akiden”, sra. Maduro ta bisa. Hospital tin cu bay traha mas eficiente y mas miho y segun sra. Maduro, Sindicato ABV no ta contra cambio. Mester bin cambio pa mehora hospital pero e forma con e cambionan ta tumando lugar no ta e forma corecto segun sra. Maduro.
“Bo no por bin tuma decisionnan sin tin un sociaal beleidsplan y sin comunica na drechi cu e sindicato, ki bo plan ta? Presenta bo plan y bisa ki bo ideanan ta, y no tira palabra, traha video bunita, papia bunita”, sra. Maduro. Ta bay tin cierto hendenan cu lo mester cambia di funcion tabata un di e director medico nobo su remarkenan, esey kiermen un reorganisacion. Sra. Maduro ta splica cu ta uza palabra bunita cu e no ta reorganisacion pero mas bien un ‘ombuiging’, pero ta bon cla cu ta un reorganisacion ta tumando lugar na un forma hopi deshonesto cu falta di respet pa sindicato y empleadonan.
Actualmente tin un inkietud na hospital entre cierto trahadonan cu ta sinti nan mes intimida, nan ta bin traha cu miedo pasobra si hefenan mes e director por a hinca bao di su hala y gara, kico ta resta di e trahadonan segun sra. Maduro.
Sindicato ABV no ta di acuerdo riba e strategia y forma con e director medico nobo kier purba cambia e organisacion aki, pasobra claro cu mester bin cambio pero no na e forma aki.
Nos a puntra sra. Maduro si sindicato ta sinti cu e director medico nobo kisas bao opdracht, hayando ordo di otro caminda. “Mester por ta, pasobra corda bon, e ta representante di Aruba, papiando namens Aruba, pa loke ta trata cuido di pais Aruba, tres pechis strategico y pisa”, segun sra. Maduro.