Prensa a haci e pregunta na Jacco Vroegop, director medico na Hospital e siman aki durante un rueda di prensa, kico e como director nobo ta haya di e edificio nobo di hospital, si esaki ta un bon proyecto si of no, despues di varios keho di pashent como tambe personal riba e infrastructura di esaki.
Sr. Vroegop ta bisa cu durante ultimo simannan el a combersa cu varios hende y wak rond e edificio completo. “Mi ta kere e ta demotiva hende cu e ta tarda asina hopi cu tin asina hopi cos cu mester wordo haci ainda”, e ta remarka. E ta haya cu tin cosnan cu por bay otro pa motibo cu nan no ta muchu safe of fastioso.
Prensa a keda press e director puntrando e si e edificio nobo ta uno bon traha si of no, pasobra por corda con ultimo awasero a yobe y tabata tin bastante inundacion akinan. “Mi ta hay’e un pregunta poco fastioso pasobra e proyecto di construccion ta tardando hopi, y esaki kiermen cu tin algun cos a wordo traha cu kisas ta ouderwets”, segun sr. Vroegop. E ta sigui bisa cu “Nos ta wak tambe den e construccion cu tin algun puntonan di problema, y nos kier soluciona esakinan.” Hunto nan kier percura pa resolve tur e puntonan aki cu no ta bon. E director ta haya cu generalmente e edificio ta bon, pero tin algun punto cu por wordo ahusta.
“Ultimamente e ta bay bira un bon edificio, mi ta compronde cu e no ta totalmente contesta e pregunta. Nos a caba di sinta awo akinan, e historia mi conoce un poco caba di antes, achteraf por saca un conclusion cu kisas lo tabata miho pa construi un hospital riba Aruba na un area mas halto, tsunami proof, un hospital totalmente nobo, kisas e lo a bay mas lihe y sali mas barata”, e director ta splica.
Tin varios motibo dicon esaki no a pasa, pero e director ta sigui splica cu un solo hospital riba nos isla unda tur cos ta central kisas lo tabata hopi mas miho. Sinembargo no por cambia esaki awor y mester traha cu loke tin.