Director Medico nobo na Hospital, Jacco Vroegop ta laga sa durante un conferencia di prensa awe cu e ta sinti poco sorprendi cu declaracionnan haci ayera durante un rueda di prensa di sindicato AVB caminda ta declara cu e director ta tumando decisionnan pa un reorganisacion sin cana e caminda debidamente.
Sr. Vroegop ta bisa cu unico cos cu nan ta bezig cu ne ta percurando pa tur cos cana bon na Hospital, den parti di e organisacion y financiero. E ta enfatisa cu no ta trata di reorganisacion, pero mas bien un ‘ombuiging’ pasobra tin mester di cambionan pa ‘sera buraconan’ y si mira e hendenan cu tin na hospital, e ta bisa cu tin hopi tiki hende trahando na hospital, contrario di loke ABV a remarka ayera cu e director a expresa cu tin demasiado hende trahando na hospital. “No ta asina cu tin un tsunami di vacatura tampoco, e vacaturanan existente ta na su luga pasobra tin mester di hende pa por sigui cumpli cu e cuido cu Aruba ta spera di nos”, sr. Vroegop ta expresa.
Un di e metanan pa e siguiente añanan ta pa ofrece mas opleiding na empleadonan na Hospital pa nan sigui crece den nan carera y percura pa mas hopi Arubiano ta bon opgeleid akinan enbes di trece mas hende di afo cual ta mas caro.
E director ta splica cu tabata tin bon dialogo cu sindicato den ultimo temponan y a pone nan na altura riba kico tur gerencia ta haciendo, dus ta sinti hopi sorprendi cu declaracionnan haci ayera. “Esaki por ta causa di un mal entendimento cual nos ta bay traha riba dje”, segun sr. Vroegop. E ta enfatisa cu no kier crea desunion pero al contrario kier ta na mesun liña di comunicacion cu tur stakeholders, cu sindicato y tambe empleadonan cu no ta miembro di sindicato. “Nos kier papia cu tur hende pa percura cu nos tin e mesun vision y mision”, segun sr. Vroegop.
Diferencia entre reorganisacion y ‘ombuiging’
E director ta splica cu un reorganisacion ta wordo uza pa describi ora cu ta trata di personanan dus cu lo meter wordo reorganisa of kita for di nan funcion den cuadro cu fluho di trabao, pero un ‘ombuiging’ ta buscando tur tools cu tin den cas pa traha mas eficiente, trahando hunto cu otronan den region, y manehando e finansas.
Despues di basta tempo, porfin Hospital tin un hunta di directiva completo pa un termino largo, segun Gregory Croeze, Lid di raad van bestuur di Hospital desde April 2020 ta informa awe durante un rueda di prensa. E ultimo añanan tabata tin varios cambio den hunta di directiva. Na varios momento tabata tin solamente un miembro, mientras statuto ta bisa cu mester tin dos: un presidente y un lid, den e caso aki e director medico nobo Jacco Vroegop ta presidente y sr. Croeze ta dus e Lid. Cada un di nan tin nan portofolio. Loke ta cay bao di sr. Croeze ta e parti di bedrijfsvoering, of director financiero, y parti di cuido ta cay bao di e presidente di Raad van Bestuur, of dus director medico.
Aworaki sr. Vroegop tin mas o menos dos luna cu Hospital. Nan a cuminsa den un tempo basta fastioso den 2020, mey mey di diferente calamidad entre otro un hacking cu a tuma luga cu a causa disturbio den hospital y hopi informacion a wordo perdi, caminda hospital ainda no ta exactamente unda nan mester ta bek pa via di esaki. E ultimo añanan tabata tin tekort financiero hopi grandi tambe door di diferente motibo y awor ta wak con por sanea hospital pa e ta un stichting hopi mas sano. A bini Covid19, tambe un candela na Juni cu a causa panico den cas, dus asina diferente reto cu Hospital mester a confronta.
Sr. Vroegop ta haya cu su prome impresion den e ultimo simannan akinan na Aruba ta cu nos isla por ta hopi orguyoso di e cuido brinda na Hospital y hendenan cu ta traha eynan. E director medico ta laga sa cu e ta haya hopi cos positivo cu ta wordo haci den Hospital y cu hunto por logra yega na haci Aruba su hospital un di esunnan di mas top den nos region. Sr.Vroegop tin experiencia medico y tambe experiencia di maneho cual ta percura pa por trece cambionan hopi facil y cu por yega na otro mas miho.