MERCA – “E acontecimento realmente horibel cu a sosode riba e vuelo aki, a lanta hopi respuesta di nos tur: indignacion, rabia, decepcion.”
Asina Oscar Munoz, director ehecutivo di United Airlines a cuminsa den su carta di disculpa, publica diamars, despues di e escandalo cu a provoca e imagennan di un homber saca na lastramento for di un avion di e compania aereo Mericano.
Den e mensahe unda cu Munoz a pidi disculpa, specialmente na e pasahero “expulsa cu forsa” y e otronan a bordo di e vuelo 3411 cu diadomingo tabata cubri e ruta di Chicago pa Louisville.
E ehecutivo a bisa di ta sigui “perturba” pa loke a sosode.
“Ningun hende mester wordo maltra di e manera aki,” el a afirma. “Mi kier pa boso sa cu nos ta asumi pleno responsabilidad y cu nos ta traha pa regl’e.”
Sangrando
E episodio a cuminsa cu un vuelo di United Airlines sobrebendi. Door di no conta cu suficiente boluntario pa baha, e aerolinea mericano a eligi cuater pasahero.
Un di nan a nenga na descende y a wordo baha cu forsa.
Den un comunicado interno cu a wordo filtra pa prensa mas tempran diamars, Munos a defende cu e empleadonan na Chicago, bisando “di a sigui e procedimentonan estableci pa lidia cu situacionnan manera esaki.”
Sin embargo, e imagennan di e homber wordo lastra den e gang y incluso sangrando na su bora a bay rond mundo y a provoca indignacion. Incluso tabata tin esnan catalogando e accion aki di descriminatorio, ya cu e pasahero tabata tin e apariencia di ta Asiatico.
E identidad di e homber cu a wordo identifica na e momento ey como un dokter, no a wordo revela.
Tabata di tal escandalo cu diamars, e accionnan di e compania aereo a cay te na un 4,4%, provocando cu e balor di mercado di e compania a cay na un momento den cerca di $1000 miyon, aunke despues e titulonan a recupera, rebahando e perdidanan na 1%.
Fuente: BBC Mundo